Се реконструираат улици во населбата 11 Октомври во општина Кисела Вода

Од утрово се реконструираат улици во населбата 11 Октомври. Општина Кисела Вода соопшти дека нов асфалт ќе добијат улици на кои немало никаков зафат 60 години, а се користат интензивно бидејќи се во централното и најгусто населено јадро на општината.

-Асфалтирани ќе бидат улицата „Ѓорѓи Сугаре” со сите нејзини краци и кракот на улицата „Михаил Чаков”, а се решава и проблемот со паркирањето преку изградбата на неколку нови паркинзи. Покрај на функционалноста, Општина Кисела Вода внимава и на естетиката, па така, со ново зеленило, урбана опрема и нови пристапни патеки ќе се подобри и ликот на овој дел од градот, соопшти општината.

Градоначалникот Орце Ѓорѓиевски изјави дека улицата „Ѓорѓи Сугаре” со сите нејзини краци наскоро ќе добие комплетно нов асфалт, како и кракот на улицата „Михаил Чаков”.

-Се работи за позиции на кои не е интервенирано речиси по земјотресот во Скопје, а се улици кои секојдневно се користат од граѓаните и навистина претставува проблем секое движење по нив. Во овој дел од општината го решаваме и проблемот со паркирањето, кое беше даден збор пред моите сограѓани, па паралелно се прават нови четири паркинзи кај трим патеката кои се веќе во завршна фаза, како и уште еден во населбата, рече Ѓорѓиевски.