Се огласи Арсовска: Јавен повик утре, но само за линиите 20 и 22, и редица прашања за Мицкоски

По повеќедневни блокади на сообраќајниците во Скопје од страна на приватните превозници, кои си ги бараат парите, а кои наводно им ги должи Градот, денеска се огласија од Град Скопје и тоа со информација дека оспособиле дополнителни 140 автобуси за ЈСП и дека утре ќе објават јавен повик за превозници за линиите 20 и 22.

„Јавниот градски превоз го организираат органите на локалната самоуправа, а не приватни бизнисмени, политички партии или други интересни групи. Во случајов, организацијата на јавниот градски превоз е обврска на градот Скопје и ЈСП. Основна заложба на ова градско раководство е оптимизација на непродуктивните трошоци и пренасочување на тие средства кон проекти од корист за граѓаните. Оттука, Градот Скопје и ЈСП во последните шест месеци успеа да оспособи 130 автобуси од флотата на ЈСП со што бројката на градски автобуси се зголеми од 140 активни во овој период минатата година, на 270. На овој начин, граѓаните на Скопје добиваат подобра, поефтина, сигурна и стандардизирана услуга“, стои во соопштението од Град Скопје.

Што се однесува до јавниот повик, тој ќе биде објавен утре, а се однесува на линиите од кој градот Скопје има потреба – тоа се линиите со бр. 20 и бр. 22. Единствена разлика е во тоа што ниту „Слобода превоз“ ниту „Макекспрес“ нема да можат да конкурираат една година од денот на раскинување на договорот поради прекршување на одредбите од нивна страна, појаснуваат од град Скопје.

Оттаму ги повикаа сите приватни превозници да аплицираат на објавениот јавен повик, индивидуално или преку претставник на група на приватни превозници.

Во соопштението не изостанува и партиска нота, па од градот велат: „Што се однесува на патетиката на ВМРО-ДПМНЕ, ги повикуваме да одговорат на следните прашања:

– Дали Христијан Мицкоски со неговиот директор на штаб Орце Тодоровски, инаку притворен и првообвинет во случајот ‘Делчевски ниви’, договараа набавка на 150 автобуси од Унгарија?

– Дали Христијан Мицкоски и неговиот актуелен шеф на штаб, Ивица Томовски, преку негови фирми е единствен подобен за одржувањето и чистењето во општините, училиштата и претпријатијата каде ВМРО-ДПМНЕ е власт?

– Дали Христијан Мицкоски заедно со Ковачевски имал тајна средба во еден скопски локал?

– Дали е точно дека Христијан Мицкоски, Александар Николоски, заедно со Зоран Заев и Венко Филипче пред два месеци имале заеднички ручек во ресторан во Малешевијата каде се зборувало за уставните измени?

– Дали е точно дека Христијан Мицкоски има истрага во ОЈОГОКК за криминал со хидроцентрали кој се држи во фиока?

– Дали е точно дека брат на член на обезбедувањето на Христијан Мицкоски, сопственик на фирмата ‘Моби Саунд’ е единствен организатор на манифестации во општините каде власт е ВМРО-ДПМНЕ?

– Дали е точно дека Игор Јанушев, другар на Христијан Мицкоски и актуелен пратеник, како директор на ЈСП склучил штетен, речиси криминален договор со фирмата ‘Маратон’ за рекламирање на автобусите на ЈСП, и дали е точно дека од овој бизнис се делат и провизии?

Што се однесува на вицепремиерот во владата на СДСМ Фатмир Битиќи, пред да зборува за некаква неподготвеност на Градот, прво да одговори на следните прашања:

– До каде е автопатот кон Охрид?
– До каде е автопатот кон границата со Бугарија?
– До каде е Клиничкиот центар?
– До каде се инвестициите од Гугл и Фејсбук?
– До каде е инфлацијата?“, завршува ова чудно соопштение. (Н.В.)