САД планираат дополнителни санкции за руската нафта: На удар нафтени компании, танкери и трговци

Администрацијата на претседателот Џо Бајден планира да воведе нови санкции кон Русија поради нејзината војна во Украина, со фокус на приходите од нафта, велат три извори запознаени со ситуацијата.

Администрацијата на Бајден се обидува да ја зајакне поддршката за Украина пред новоизбраниот претседател Доналд Трамп да ја преземе функцијата на 20 јануари, имајќи ги предвид честите критики на Трамп за цената на американската помош за Украина, пишува Ројтерс и ги потврдува неодамнешните медиумски извештаи.

„Тоа е многу значаен пакет. Вклучува две руски нафтени компании, повеќе од 100 танкери, трговци со нафта, руски осигурителни компании итн.“, рече еден функционер, без да ги именува ентитетите.

Не е јасно каква позиција ќе заземе Трамп за санкциите против Русија.

Администрацијата на Бајден планира санкции кои ќе бидат насочени кон танкери со руска нафта продадена над западната граница од 60 долари за барел, велат изворите.

Дури и ако нафтата се продава над лимитот, руската сурова нафта обично се продава со попуст на глобалниот пазар, а Кина и Индија се подготвени да продолжат да купуваат.

Првиот американски функционер рече дека индиското Министерство за надворешни работи било информирано за претстојните санкции, истакнувајќи дека изобилството на пазарна понуда и ниските цени на нафтата би можеле да и помогнат на Индија да ги задоволи своите потреби за сурова нафта.

Индиското Министерство за надворешни работи не одговори веднаш на барањето за коментар.

Друг извор рече дека санкциите најверојатно ќе бидат насочени кон поединци вклучени во трговските мрежи за нафта над границата на цената.

Русија ја користи таканаречената „флота во сенка“ на стари бродови за да ја заобиколи границата на цените. Многу од овие бродови се небезбедни и склони кон излевање на нафта, предупредуваат поморските експерти.

Од февруари 2022 година, кога Русија ја нападна Украина, САД санкционираа десетици бродови од оваа флота, која брои стотици бродови, за да ја намали способноста на Русија да ја финансира војната.

Американската министерка за финансии Џенет Јелен минатиот месец изјави дека САД размислуваат за дополнителни санкции против танкери и не ја исклучија можноста за санкции кон кинеските банки, со цел да ги намалат приходите на Русија од нафта и пристапот до странски ресурси.

Канцеларијата за контрола на странски средства на Министерството за финансии на САД не одговори веднаш на барањето за коментар во неделата.

Групата Г7, ЕУ и Австралија воведоа ограничување на цената на руската нафта од 60 долари на крајот на 2022 година, забранувајќи ја употребата на западните поморски услуги како што се транспортот, осигурувањето и финансирањето на испораките на нафта по цени над границата.

Минатиот месец, британската влада санкционираше 20 бродови и две трговски фирми за наводна вмешаност во руската трговија со нафта.

Русија е меѓу трите најголеми земји во светот според производството на нафта.