Реформата на јавните претпријатија е врвен приоритети на Каја Шукова

Кандидатката за градоначалничка на Скопје од СДСМ, Каја Шукова, денеска изјави дека реформата на јавните претпријатија ќе биде нејзин врвен приоритет, затоа што токму тие се основата за функционален, уреден и хуман град. Таа оцени дека Скопје денес изгледа запуштено, нечисто и хаотично затоа што јавните претпријатија се заробени од партиски интереси, долгови и неспособно раководство. „Граѓаните плаќаат за услуги, а добиваат несобран смет, нефункционален јавен превоз и хаотична инфраструктура“, истакна Шукова.

Таа најави дека во администрацијата на Град Скопје ќе спроведе вистинска реформа, со цел јавните претпријатија конечно да им служат на луѓето, а не на партиите. Според неа, ЈСП ќе се модернизира со нови еколошки автобуси, електронски систем за наплата и воспоставување на брз автобуски транзит, со што ќе се врати довербата во јавниот превоз. „Комунална хигиена“, рече таа, ќе се ревитализира со современ центар за селекција и рециклажа, редовно собирање отпад и конечно решавање на Вардариште.

„Во ’Паркови и зеленило’ ќе започне нова ера – ќе засадиме 10.000 дрвја и ќе изградиме 15 нови паркови во 15 месеци, со редовно одржување и враќање на зеленилото во маалата. ‘Водовод’ ќе го насочиме кон стабилно снабдување, модерна опрема и намалени загуби на вода, а ЈП ‘Лајка’ ќе го развиеме во вистински хуман систем за згрижување и грижа за уличните животни“, додаде Шукова.