Реакција на Холандија поради санкциите на Трамп кон Судот во Хаг

Хаг – Холандските политичари реагираа на одлуката на американскиот претседател Доналд Трамп да воведе санкции против Меѓународниот кривичен суд, при што некои десничари побараа негово дислоцирање од земјата.

Холандскиот министер за надворешни работи Каспар Велдкамп (партија на Новиот социјален договор), најави дека Холандија жали за таквата одлука на Белата куќа.

– Холандија жали за извршната наредба за воведување санкции на МКС. Работата на судот е од суштинско значење во борбата против неказнивоста. Нашата земја има силна репутација и одговорност како земја домаќин на важни меѓународни правни институции. Холандија активно придонесува за зајакнување на меѓународниот правен поредок и мултилатералната соработка и ќе ги исполни обврзувачките меѓународно право и обврските од договорите со добра волја, наведе Велдкамп.

Но, холандскиот десничар Герт Вилдерс го поддржа Трамп за санкциите.

– Не може ли Меѓународниот кривичен суд да се пресели во Белгија или нешто слично? Никогаш не ја разбрав поентата да се има таа институција овде, наведе Вилдерс.

Трамп потпиша извршна наредба за воведување санкции против Меѓународниот кривичен суд, обвинувајќи го за нелегитимни и неосновани дејствија насочени против САД и блискиот сојузник Израел. Мерката наметнува финансиски и визни ограничувања за поединци и нивните семејства кои му помагаат на МКС во истрагите на американските граѓани или сојузници.