Пропусти при обезбедувањето на доказите во случајот „Ристов“, вештак посочува можност за туѓа ДНК


Со сведочење на вештото лице од областа на криминалистиката, Атанас Козарев, денеска во Основниот кривичен суд во Скопје продолжува судскиот процес против апелацискиот судија Ѓоко Ристов, обвинет за прикривање имот.

Козарев посочил пропусти во постапката за обезбедување и ракување со доказниот материјал при претресот во домот на родителите на Ристов во Неготино, извршен на 18 јануари 2026 година. Според неговата стручна анализа, начинот на кој биле отворани, раздвојувани, означувани и пакувани алуминиумските фолии и банкнотите оставил можност за контаминација со биолошки материјал од други лица.

Вештакот рече дека во својата практика првпат се соочува со случај во кој доказни материјали од ваков вид биле отворани и раздвојувани без соодветна постапка, а потоа оставени на подот. Според него, просторот не бил форензички заштитен, што дополнително ја зголемило можноста за присуство и пренос на биолошки траги од други лица.

Козарев ја нагласи важноста секоја фолија да биде фотографирана и означена пред отворањето, за подоцна да може прецизно да се утврди која фолија обвиткувала одреден сноп банкноти, како била поставена и кои биле нејзините внатрешна и надворешна страна. Ова, според него, е особено важно при ДНК-анализите, бидејќи овозможува земените брисеви да се поврзат со конкретна површина од доказниот материјал.

Тој посочува дека доколку првичната состојба не е соодветно документирана, а фолиите дополнително се кинат, мешаат и преместуваат, станува отежнато утврдувањето од која површина бил земен определен брис. Од доставениот видео-материјал, според неговото сведочење, не можело да се забележи дека фолиите биле фотографирани од сите релевантни страни пред отворањето, ниту дека секоја била соодветно означена.

„Клучен заклучок е дека поради отсуството на антиконтаминациски мерки, доказниот материјал не бил целосно заштитен и постоела реална можност за внесување или пренос на туѓа ДНК“, изјави Козарев.

Во текот на рочиштето, обвинителката Искра Хаџи Василева побара да биде прикажана видеоснимка од случај во Италија, во кој полицијата постапувала при пронаоѓање пари скриени во ѕид. И покрај приговорот, судијката Билјана Коцевска дозволи видеото да биде прикажано. По неговото гледање, Козарев изразил зачуденост од постапувањето на италијанските полициски службеници, посочувајќи дека дел од нив носеле ракавици, додека други не.

Предмет на судската постапка се 350.000 евра пронајдени при претресот во домот на родителите на Ристов во Неготино. Парите биле откриени во 13 одделни пакувања, скриени во заѕидан простор во шуплините од тули во ѕидот на една од собите. Според податоците од обвинителството, станувало збор за 610 банкноти од по 500 евра и 225 банкноти од по 200 евра, дел од нив со рачно испишани износи.

Ристов се сомничи дека, како службено лице и судија во Апелацискиот суд Скопје, давал лажни податоци за сопствениот имот и имотот на семејството, прикривајќи имот кој значително ги надминува неговите законски приходи, спротивно на обврската за пријавување на имотната состојба. Обвинителството тврди дека располага со докази за сопственоста на паричните средства, додека Ристов се соочува со обвинение за прикривање имот.

Судењето го води судијката Билјана Коцевска, а следното рочиште е закажано за 9 декември.