Продажбата на „Тесла“ во ЕУ во првиот квартал падна за 45 отсто

Продажбата на „Тесла“ на пазарот на ЕУ продолжи да опаѓа во првиот квартал од 2025 година, при што регистрациите паднаа за 45% на годишно ниво, според податоците на Европската асоцијација на производители на автомобили (ACEA) објавени денес.

Во ЕУ, бројот на регистрации на возила на „Тесла“ се намали на 36.167 возила во споредба со 65.774 во првите три месеци од 2024 година, што е најголем релативен пад во тој период меѓу големите производители на автомобили.

Продажбата на „Тесла“ во Европската Унија се намали за 36% во март во споредба со март 2024 година.

Ова е продолжение на негативниот тренд за американскиот производител на автомобили во сопственост на милијардерот Илон Маск, иако падот е малку забавен во споредба со почетокот на годината.

Помеѓу јануари и февруари, регистрациите се намалија за 49% на годишно ниво.

Групацијата „Фолксваген“ објави мало зголемување од речиси 5%, додека „БМВ“ забележа скромен раст од 0,4%. Мерцедес-Бенц, сепак, забележа пад од 6,2%.

Генерално, регистрациите на нови автомобили во Европската Унија се намалија за 1,9% во првиот квартал, иако електричните возила (EV) забележаа раст од 23,9%, достигнувајќи пазарен удел од 15,2%.

Регистрациите на електрични автомобили значително се зголемија во март во Германија, Белгија и Данска, а почнуваат да се зголемуваат и во Шпанија и Италија, кои заостануваат далеку зад своите европски соседи.

Од друга страна, тие се намалија во Франција (-14% во споредба со март 2024 година), при што ефектите од намалувањето на бонусот за животната средина сè уште се чувствуваат.

Овој напредок кај електричните возила во Европската Унија не е доволен за автомобилското лоби, кое укажува на „солиден јаз помеѓу амбициозните цели за декарбонизација и реалноста на побавно од очекуваното усвојување од страна на потрошувачите“, според Сигрид де Врис, генерален директор на ACEA.

Во меѓувреме, хибридните модели сè повеќе го освојуваат европскиот пазар: 35,5% од автомобилите регистрирани во првиот квартал беа хибриди, во споредба со 28,7% од бензинските модели.