Пристигна одговорот на ЕУ на заканата од Трамп за царините

Европската Унија работи „добронамерно“ за да обезбеди спроведувањето на трговскиот договор со Соединетите Американски Држави да се базира на „почитување“, а не на „закани“, изјави европскиот комесар за трговија Марош Шефчовиќ, по коментарите на Доналд Трамп за можни царини од 50 проценти.

Американскиот претседател изјави дека не „бара трговски договор“ со Европската Унија, заканувајќи се дека ќе воведе царини од 50 проценти на увозот од 27-те земји-членки од 1 јуни.

„ЕУ е целосно посветена и решена да гарантира договор што ќе им одговара на двете страни“, напиша Марош Шефчовиќ на X по разговорите со трговскиот претставник на САД, Џејмисон Грир, и секретарот за трговија, Хауард Лутник.

„Трговијата меѓу ЕУ и САД мора да биде водена од меѓусебно почитување, а не од закани. Ние сме подготвени да ги браниме нашите интереси“, додаде европскиот комесар.

На почетокот на мај, ЕУ се закани дека ќе воведе царини на увоз од САД во вредност од 95 милијарди долари, вклучувајќи автомобили и авиони, доколку трговските разговори со Трамп не успеат.

Комисијата, исто така, објави дека ќе извести за трговските мерки што САД ги воведуваат против неа до Светската трговска организација (СТО).

Во последните месеци, ЕУ беше трипати погодена од царините на американската администрација: 25 проценти за челик и алуминиум, кои беа објавени кон средината на март, 25 проценти за автомобили, а потоа 20 проценти за сите други европски производи во април.

Најскоро објавените царини беа суспендирани до јули за да се овозможат преговори, но царините од 10 проценти сè уште важат за повеќето стоки што ги извезуваат 27-те земји-членки во САД.

Доналд Трамп редовно ја напаѓа Европа откако се врати во Белата куќа за својот втор мандат, сметајќи ја, како што рече, „полоша од Кина“ во трговските односи.

Соединетите Американски Држави го проценуваат својот дефицит со ЕУ во 2024 година во трговијата со стоки на 235 милијарди долари, но Европската комисија истакнува дека суфицитот на САД во услугите го намалува трговскиот дефицит на 50 милијарди евра (околу 57 милијарди долари).