Предметот за нападот врз девојката во Охрид даден на друг обвинител
Променет е обвинителскиот тим што постапува по случајот со бруталното насилство врз 26-годишната Сара Ѓорѓиеска во Охрид. Според информации објавени од порталот „Охрид1“, предметот му е одземен на досегашниот јавен обвинител Стојанче Арнаудоски, а понатаму ќе го води обвинителката Викторија Коваческа Мандулоска од Основното јавно обвинителство Охрид.
Како што објавува порталот, прераспределбата се случува во период кога случајот предизвика силни реакции во јавноста и барања за целосно и непристрасно утврдување на сите околности. Според информациите до кои дошла редакцијата на „Охрид1“, причината за одземањето на предметот наводно е блискоста на досегашниот обвинител со семејството на осомничениот Кристијан Корабоски. Во објавата се наведува дека Арнаудоски бил семеен пријател со семејството на Љубинка Корабоска, поранешна претседателка на Државната комисија за спречување на корупцијата, и нејзиниот сопруг Гоце Корабоски, кој во медиумските извештаи е посочен како инспектор во Управата за јавни приходи.
Сепак, овие информации засега не се независно потврдени, а нема ниту официјално образложение од обвинителството дека наводната блискост е причината за промената на обвинителот.
На официјалната веб-страница на Јавното обвинителство, и Викторија Коваческа Мандулоска и Стојанче Арнаудоски се наведени како јавни обвинители во ОЈО Охрид.