Позитивната листа на лекови ќе биде проширена со осум нови лекови

Позитивната  листа на лекови на Фондот за здравствено осигурување ќе биде проширена со осум нови лекови што досега не биле на пазарот и со неа ќе се заштедат до два милиона евра, соопшти премиерот христијан Мицкоски на прес конференција денес.

 Мицкоски очекува дека во иднина уште повеќе ќе се проширува позитивната листа на лекови и дека истите нема да се набавуваат преку привилегирани семејни веледрогерии.

„Ја поздравувам, честитам и очекувам и во иднина уште повеќе да се проширува, со што ќе се стави фокус на објективноста, а не на привилегирани семејни веледрогерии коишто изминативе децении го исцицаа здравствениот систем и практично го доведоа  ваков како што е, со триплирани вредности на медицински апарати, лекови итн. И сега сакаат огромни суми на камати на грбот на граѓаните да спечалат, па блокираат здравствени установи итн.“, изјави премиерот.

Владата како што рече премиерот нема друг интерес освен интересот на граѓаните и пациентите.

„Сѐ ќе испитаме, сѐ ќе истражиме но, ја поздравувам одлуката на директорот на Фондот, само така треба да се продолжи да се работи, за еден интерес е тоа, интересот на граѓаните и пациентите, немаме друг интерес“, подвлече Мицкоски.