Помалку документација за добивање помош побараа лицата со попреченост

На средбата во Министерството за финансии, се говореше за проблемите со коишто се соочуваат лицата со церебрална парализа, но и лицата со други попречености.
Министерката за финансии, Гордана Димитриеска-Кочоска денеска во својот Кабинет оствари средба со граѓани и претставници на Здружението на родители на деца со церебрална парализа – Скопје. На дискусијата се говореше за проблемите со коишто се соочуваат лицата со церебрална парализа, но и лицата со други попречености, воопшто.

Без многу формалности, и министерката и гостите се потрудија средбата да биде сосем опуштена и пријателска, со што, бидејќи „денеска сите сме на исто скалило“, домаќинот ги поттикна и охрабри присутните да проговорат за попреченоста којашто, всушност, општеството им ја наметнува на своите граѓани.

– Како Министерство, наша обврска е да слушаме, разбираме и делуваме – за да создадеме систем што ќе нуди поддршка, а не препреки, истакна министерката.

Граѓаните изразија потреба од повеќе финансии, на пр. за јавниот превоз за луѓето со попреченост, којшто е бесплатен и треба да биде добро организиран, за да се сведат на минимум сите несакани појави со горивото, недостатокот од возачи и сл. Стана збор и за дневните центри за згрижување на лицата со попреченост, во смисла – организација, доволно вработени, дефектолози, лични и образовни помошници, исхрана и сите придружни елементи.

Министерката нагласи дека лично ќе се заложи за подобрување во тие области, како и за поголем буџет за оваа заедница.

Повеќемина дискутанти ја истакнаа потребата од поедноставување на прибирањето документи за добивањето парична помош, во облик на посебен додаток, надоместок за туѓа нега итн. Во таа смисла, претседателката на Здружението на родители, Марина Билбиловска побара од институциите да не бараат секоја година потврда за здравствената состојба на засегнатото лице.

– Тоа е сосем непотребно, и како трошоци и губење време за бирократските процедури, и во однос на состојбата (на детето), којашто е трајна и не се менува, за постојано да се потврдува, појасни Билбиловска.

Министерката истакна дека не е надлежна за сите проблеми, но може да се заложи за тоа на седниците на Владата. Најави отворање на конкретниот Закон и негово подобрување. Засегнатите граѓани замолија тоа да се случи што побргу и да не се одолговлекува повеќе. Меѓу другото, во оваа смисла, се спомна повторно и потребата од целосна дигитализација на сите овие процедури, како и од поделотворно информирање за нив.

Родителите се загрижени и за згрижувањето на нивните деца понатаму.

– Што после нас?, праша Марјан Илковски од истото Здружение.

Во таа смисла, и тој и Билбиловска порачаа дека предвидениот скопски центар за прифаќање на лицата со попреченост, кои не можат да се грижат за себе и кои ги изгубиле своите родители, мора да биде под државна капа.

Билбиловска по настанот порача дека македонското општество мора да ги прифати и целосно да ги интегрира своите граѓани со попреченост.

– Има мигови коишто не можеме – а мора да ги издржиме… Има судбини кои не можеме да ги промениме – а мора да ги прифатиме… Има вистини коишто нѐ болат – а мора да ги живееме. Неправедниот и глув систем… Туркањето на приоритетите под тепих… Онаа познатата фраза: „Тоа не е мој проблем”. Етикетирањето на глупата маса на луѓе наречена општество… Сѐ тоа мора да се искорени. Попреченоста е состојба со којашто човек мора да се бори. Среќата е избор. Оптимизам мора да постои, изјави Билбиловска.

За неа, ова беше „убава и конструктивна дружба со министерката“, на којашто сите разговараа за проблемите со коишто се соочуваме.