Почна реконструкцијата на улицата „Васил Ѓоргов“ во Капиштец


Екипите на Град Скопје од денеска ја реконструираат улицата „Васил Ѓоргов“ во Капиштец, на потегот од крстосницата со улицата „Френклин Рузвелт“ до булеварот „Мајка Тереза“ (улицата „Водњанска“).

На овој потег, ќе се изврши целосна реконструкција на коловозот на должина од околу 1.000 метри, обнова на оштетените делови од тротоарите, замена на оштетените рабници, како и корекција на крстосницата со улицата „Френклин Рузвелт“.

Улицата „Васил Ѓоргов“ е 13-та реконструкција што ја почнува Градот Скопје во оваа градежна сезона, а дел од сообраќајниците што веќе се реконструираат влегуваат во финалната фаза.

„Сакам да се заблагодарам на граѓаните на Скопје за разбирањето, зашто ова што го прави Градот Скопје на крајот на летото и на почетокот на есента е од вистински интерес токму на граѓаните. Метежот ќе заврши, а потоа, за неполн месец, на сите локации каде што работиме ќе добиеме целосно обновена или нова инфраструктура. Скопје нема алтернатива освен да ја подобри инфраструктурата зашто безбедноста во сообраќајот, а особено безбедноста на пешаците и на велосипедистите, е примарна за секој од нас“, рече денеска градоначалникот Петре Шилегов.

За реконструкција на улицата „Васил Ѓоргов“ ќе се вложат околу 20 милиони денари со вклучен ДДВ, а градежните работи треба да завршат во рок од 45 дена.