Пензионерите на протест пред влада, бараат оставки од Ковачевски и Тренчевска

Со транспаренти и пречкртани фотографии од премиерот Димитар Ковачевски и министерката за труд и социјална политика,  Јованска Тренчевска, пензионерите од сите градови на Македонија, денеска протестираат пред Владата за повисоки пензии.

Тие бараат и оставки од премиерот и министерката, но не се задоволни од 6 отсто зголемување на пензиите, туку бараат линеарно зголемување од 3.500 денари за секој пензиор. 

Преку транспарентите обвинуваат дека во државата се приватизирало по терк на политичарите, а тие останале со ниски примања, откако завршил нивниот работен век.

„Ако има за вас, треба да има и за нас“, вели една од пораките кои ги носат пензионерите в раце, напишани читко, со речиси технички букви, за сите да разберат. Оваа порака се однесува на неодамнешното зголемување на платите на избраните и именувани лица и на функционерите, за кое Уставниот суд одлучи дека треба да биде 78 отсто. 

Нивните барања, кои секојдневно ги повторуваа на помали протести од своите градови се  линеарно покачување од 3.500 денари за секој пензионер и промена на методологијага за понатамошна пресметка на пензијата.

Велат ќе побараат одговор од владата зошто во изминатиов период минималната плата пораснала 2,5 пати повеќе од пензијата, како и решавање на проблемот со пензионерите кои работеле во поранешните загубари, чиј стаж не е евидентиран и сега поради тоа земаат пониски пензии.

Министерката за труд и социјална политика Тренчевска, неколкупати повторува дека линеарно зголемување на пензиите не е можно, а не е ни фер, затоа што дел од пензионерите имаат повеќегодишен стаж и над 30 години, а некои едвај 15. 

Сепак, пензионерите забележуваат дека извесен период, стажот не им се бележел, а некои од вработените често работеле 10-12 часа дневно, а биле евидентирани и плаќани за 8 или за 6 работни часа.