Ова се најточните авиокомпании во светот

Мексиканската национална авиокомпанија „Аеромексико“ (Aeromexico) се најде на врвот на глобалната листа на точност на летови во 2024 година, според „Сириум“ (Cirium), компанија за воздухопловна аналитика.

Дури 86,7 отсто од нивните летови пристигнале според распоредот на летовите, односно во рок од 15 минути од планираното време за слетување, пренесува Си-Ен-Би-Си.

Џереми Боуен, извршен директор на „Сириум“, на петочниот „Squawk Box Asia“ рече дека го смета резултатот за „апсолутно“ изненадување.

„Тие имаа извонредна година. Тие ја подобрија прецизноста на нивните летови за неверојатни девет проценти. Да се ​​оди од позиција надвор од првите 10 до првото место е речиси нечуено“, рече тој.

Боуен го препиша успехот на „Аеромексико“ на нејзината корпоративна култура, инвестициите во нова опрема и соработката со главниот аеродром во Мексико Сити, кој беше рангиран на четвртото место меѓу светските аеродроми за точноста на летовите во извештајот на „Сириум“.

„Кога авиокомпанијата и нејзиниот матичен аеродром постигнуваат добри резултати, тоа значи дека тие функционираат ефективно како тим“, посочи тој.

„Саудиа“ (поранешен „Саудиска Арабија Ерлајнс“) се рангираше на второто место меѓу светските авиокомпании, напредувајќи од деветтото место на листата на „Сириум“ за 2023 година, со 86,35 отсто од нејзините летови навреме, покажа извештајот објавен во четвртокот.

„Делта ерлајнс“ се рангираше на третото место со 83,46 отсто од навремените летови, по што следи „Латам ерлајнс“ со 82,89 отсто и „Катар ервејс“ со 82,83 отсто, според извештајот „Преглед на точност за 2024 година“ на „Сириум“.

„Сириум“ четврта година по ред ја прогласи „Делта“ за „најдобра авиокомпанија во светот за оперативна извонредност“ благодарение на точноста и големината, имајќи предвид дека е меѓу најголемите авиокомпании во светот.

Помалку навремени летови

Боуен истакна дека вкупниот број на навремени летови е намален за 0,5 отсто во 2024 година во однос на претходната година. Тој додаде дека ажурирањето на софтверот CrowdStrike ненамерно приземји илјадници летови, особено оние на „Делта“, што негативно влијае на целокупната прецизност на индустријата. „Покрај тоа, имавме многу необични временски услови ширум светот“, истакна тој.

Точноста на летовите е клучен фактор за задоволството на патниците и важен показател за здравјето на авиоиндустријата. Доцнењата често ги зголемуваат трошоците на авиокомпаниите и го намалуваат моралот на екипажот, особено кај вработените кои директно комуницираат со патниците, пренесува Пословни дневник.

Извештајот ја анализираше и точноста на регионалните авиокомпании, од кои некои постигнаа поголем процент на точност од глобалните авиопревозници. Јужноафриканската компанија „Сафаир“ постигна 93,82 отсто прецизност на летот, „Оман Ер“ 90,27 отсто, Панамската „Копа ерлајнс“ 88,22 отсто и „Ројал Џордан ерлајнс“ 87,02 отсто.

Ништо ново во Европа

Во Европа, шпанските компании „Ибериа експрес“  со 84,69 отсто и „Ибериа“ со 81,58 отсто повторно го зазедоа првото и второто место, како и на листата на „Сириум“ за 2023 година. Најдобрите јапонски авиокомпании, „Јапан ерлајнс“ со 80,90 проценти и „Ал Нипон ервејз“ со 80,62 проценти, водат во азиско-пацифичкиот регион, иако нивните проценти на точност се намалија од 2023 година.

Во Северна Америка водечка позиција ја држи „Делта“ (Delta Air Lines), додека зад неа се „Јунајтед ерлајнс“ со 80,93 отсто и „Аљаска ерлајнс“ со 79,25 отсто од точните летови.

Саудискиот аеродром „Кинг Калид“ води на светските аеродроми со повеќе од 86 отсто од навремените полетувања во 2024 година, покажува годишниот извештај на „Сириум“. Помеѓу средните аеродроми, меѓународниот аеродром „Токумен“ во Панама е најдобар со 90,34 отсто точност, додека меѓународниот аеродром „Хозе Хоакин де Олмедо“ во Еквадор, со 91,38 отсто точни летови, ја носи титулата за најточен мал аеродром во светот.

Списоци на најдобрите во 2024 година

Глобални авиокомпании

Aeromexico — 86,7%
Saudia — 86,35%
Delta Air Lines — 83,46%
Latam Airlines — 82,89%
Qatar Airways — 82,83%

Европа

Iberia Express (Шпанија) — 84,69%

Iberia (Шпанија) — 81,58%
Scandinavian Airlines — 81,4%
Vueling Airlines (Шпанија) — 81,2%
Norwegian — 79,23%

Блиски Исток и Африка

Safair (Јуѓна Африка) — 93,82%

Oman Air — 90,27%
Royal Jordanian Airlines — 87,02%
Saudia — 86,35%
Kuwait Airways — 84,63%

Азија и Пацифик

Japan Airlines — 80,9%
All Nippon Airways — 80,62%
Singapore Airlines — 78,67%
Air New Zealand — 77,58%
Thai AirAsia — 77,46%

Северна Америка

Delta Air Lines — 83,46%
United Airlines — 80,93%
Alaska Airlines — 79,25%
American Airlines — 77,78%
Southwest Airlines — 77,77%

Латинска Америка

Copa Airlines (Панама) — 88,22%
Aeromexico — 86,7%
Caribbean Airlines — 85,47%
Gol Linhas Aereas (Бразил) — 84,09%
Aerolineas Argentinas — 83,06%

Нискбуџетски компании 

Iberia Express (Шпанија) — 84,69%
Gol (Бразил) — 84,09%
Azul Airlines (Бразил) — 82,42%
Peach Aviation (Јапонија) — 82,32%
Vueling Airlines (Шпанија) — 81,2%