Олаф Шолц не успеа во Софија, пишува „Политико“
Германскиот лидер тврди дека е постигната нова „динамика“, најавувајќи дека разговорите ќе продолжат во наредните денови
Германскиот канцелар Олаф Шолц ја притисна Бугарија да ја укине блокадата на кандидатурата за членство на Северна Македонија во ЕУ за време на посетата на Софија во саботата, но не успеа да постигне пробив во долгогодишниот спор, пишува бриселски „Политико“.
Понатаму, во статијата се наведува:
„Шолц, кој застана во Софија патувајќи низ клучните главни градови во регионот, по состанокот со бугарскиот премиер Кирил Петков рече дека гледа ‘можности за напредок’. Иако таквите можности не беа очигледни во саботата, Шолц даде сѐ од себе за да стави дипломатски спин на неговата посета.
‘Овие работи не можат да се диктираат; тие треба да се решат со соработка’, рече Шолц, додавајќи дека очекува разговорите да продолжат во наредните денови и дека е постигната нова ‘динамика’. Целта на Берлин е да ги реши прашањата околу Северна Македонија пред состанокот на Европскиот совет на 23 и 24 јуни.
Петков, чија владина коалиција виси на конец откако една од четирите партии се откажа од сојузот поради стравувањата дека премиерот ќе го укине ветото на Бугарија, во саботата рече дека се држи до условите што неговата земја ги наложи за решавање на ќор-сокакот.
Бугарија, која е вовлечена во долгогодишен спор со Северна Македонија за историјата, јазикот и идентитетот, постави неколку барања од својот сосед пред да се согласи со зелено светло на преговорите за пристап во ЕУ, вклучително и Скопје да ги зацврсти правата на бугарското малцинство во земјата во нејзиниот устав.
Спорот е само последен во сериозните пречки со кои се соочи Северна Македонија на нејзиниот пат кон ЕУ. Во 2018 година, таа се согласи да го смени името во Северна Македонија за да го реши спорот со Грција.
Германија, која со години се залага за каузата за пристапување во ЕУ на земјите од Западен Балкан, е желна да го забрза процесот поради загриженоста дека Русија би можела да се обиде дополнително да сее поделеност во регионот во услови на нејзиниот поширок судир со Западот околу Украина.
За време на престојот во Скопје претходно во саботата, Шолц ја пофали Северна Македонија за чекорите што ги направи во последните години.
‘Германија е сериозна за интеграцијата во ЕУ за целиот регион и тоа особено важи за Северна Македонија’, рече тој, истакнувајќи дека земјата ги исполнила сите барања за да започне формални преговори за членство, пишува „Политико“.