ОЕЦД: Повеќето водечки економии сè уште не го достигнале нивото пред пандемијата
Економската активност во повеќето големи економии сè уште е послаба отколку што беше пред пандемијата и покрај забрзаниот раст во вториот квартал, објави во понеделникот Организацијата за економска соработка и развој (ОЕЦД).
Вкупниот бруто домашен производ (БДП) на земјите -членки на ОЕЦД остана 0,7 проценти послаб отколку на крајот на 2019 година, непосредно пред да биде прогласена пандемијата на корона вирус, се вели во најновиот извештај на ОЕЦД.
Економиите останаа под нивото пред пандемијата и покрај растот од 1,6 проценти во седумте најголеми светски стопанства (Г7) во вториот квартал, значително побрзо отколку во првите три месеци од оваа година, кога активноста се зголеми за 0,4 проценти.
ОЕЦД укажува на значителни разлики во групата „седум најголеми“, како што се нарекуваат во ОЕЦД, при што британската економија најбрзо расте во периодот од април до јуни, со стапка од речиси пет проценти. За споредба, во првите три месеци падот беше речиси два проценти.
Германската и американската економија пораснаа за 1,6 проценти, додека Канада беше единствената во Г7 што забележа пад, покажува извештајот на ОЕЦД.
Франција и Јапонија, од друга страна, остварија слаб раст на економската активност, од 0,9 и 0,3 проценти, соодветно.
Во споредба со периодот пред пандемијата, најлош е британскиот БДП, кој и покрај заздравувањето, остана во минус од 4,4 проценти на крајот на јуни. Следува Италија, чија економија е во минус за 3,8 проценти од нивото пред пандемијата.
Спротивно на тоа, најголемата светска економија, САД, се врати на нивоата пред пандемијата, се вели во извештајот.
Иако глобалниот БДП се очекува да порасне силно оваа година, и Светската банка и ОЕЦД предвидуваат дека растот ќе биде „нерамномерен“, укажувајќи на заостанувањето на помалку богатите економии зависни од туризмот.
ОЕЦД предупреди пред три недели дека поради „континуираната неизвесност“ создадена од пандемијата, најголемите економии можат барем да очекуваат „умерен раст“ на активноста во наредните месеци.