Од 5 ноември исплата на средства за клиентите на АЛТА банка без платежни картички во Битола

Од утре, 5 ноември, граѓаните кои имаат платежни сметки во АЛТА банка АД Битола, а немаат платежни картички, ќе можат да ги подигнуваат своите средства на шалтерите во главната филијала на банката во Битола, информира Народната банка.

За таа цел, ќе бидат отворени повеќе шалтери на адресата ул. „Добривое Радосављевиќ“ бр. 21, наменети за исплата на готовина, особено за пензионерите и примателите на социјална помош кои средствата ги добиваат преку сметки во банката.

Граѓаните ќе можат да подигнат најмногу 20.000 денари, колку што изнесува максималниот дозволен износ за повлекување во период од две недели.

Од 6 ноември, вклучително и во сабота, 7 ноември, филијалата ќе работи во две смени, со цел да се опслужат што поголем број клиенти.

Исплатата ќе се врши во текот на повеќе денови, според однапред утврден распоред. Граѓаните ќе добијат СМС-порака со информација за денот и часот кога треба да дојдат во филијалата.

Народната банка апелира граѓаните да се придржуваат до добиените термини и да не доаѓаат во филијалата пред определеното време или во денови кога не се повикани, за да се избегнат гужви и подолго чекање. За оние кои нема да можат да дојдат во закажаниот термин, ќе бидат обезбедени дополнителни термини.

Шалтерите ќе бидат наменети исклучиво за подигање готовина и нема да се вршат други видови трансакции.

Во тек се и подготовките за отворање шалтери за пензионерите и примателите на социјална помош во други градови во земјата, за што Народната банка дополнително ќе информира.

Народната банка воведе тримесечна администрација во Алта банка АД Битола поради околности што може сериозно да ја загрозат нејзината солвентност, односно способноста да ги покрива обврските.

Со решението донесено на 1 ноември за администратори се именувани Илија Андовски, Весна Стојчевска и Марија Тодоровска, кои ги преземаат надлежностите на Управниот и Надзорниот одбор, како и на Собранието на акционерите, со исклучок на одлучувањето за зголемување на капиталот. Андовски е посебно овластен да ги потпишува одлуките во периодот на администрацијата.

Администраторите имаат рок од 21 ден да ја утврдат целокупната состојба во банката и да достават извештај до Извршниот одбор на Народната банка. Во текот на тримесечниот период тие ќе ја контролираат и исплатата на општите и на административните трошоци, кои ќе може да се реализираат само со нивно одобрение.