Новите возила за собирање отпад предадени на „Комунална хигиена“, но уште не почнале да чистат

По повеќе од еден месец од промоцијата на новите специјализирани возила за одржување на комуналната хигиена во Скопје, но и во други 10 градови, тие се предадени на „комунална хигиена, информира скопскиот градоначалник, Орце Ѓорѓиевски, кој вели дека „во наредните денови, по завршувањето на правните процедури излегуваат на терен“.

– До крајот на неделава пристигнува и првата испорака од вкупно 3.300 нови контејнери, најголемата набавка досега.  Чистиот град значи здравје, достоинство и подобар живот за сите. Затоа, секој од нас има одговорност да го чува. Нашата работа нека биде поттик за поголема грижа, а секоја чиста улица обврска таква и да остане – изјави Ѓорѓиевски.

Градоначалникот Ѓорѓиевски нагласи дека Скопје предолго губеше поради неодговорноста и неажурноста на претходниците, а на таа запуштеност ѝ се става крај со работа и конкретни дела. Со силна волја, макотрпна работа и заедничка одговорност, Скопје повторно ќе биде горд град.

Сепак, мора да се забележи дека ова не се случува така брзо како што најавуваше Ѓорѓиевски за време на предизборната кампања и во првите денови откако седна во градоначалничката фотелја. 

Од тогаш, поминаа нешто повеќе од 10 месеци, а хигиената во Скопје е стандардно лоша, со преполни контејнери, истечоци околу нив, смрдеа сред лето и опасности во зима.