Нови компании на американската „црна листа“

Министерството за одбрана на САД го додаде кинескиот технолошки гигант Тенсент и производителот на батерии CATL на својата црна листа на компании за наводно помагање на кинеската војска во нивните активности, пренесе Танјуг.

Списокот, кој се ажурира секоја година, е предупредување до американските компании да не соработуваат со одредени фирми, од кои во моментов има 134 на листата.

Соработката со нив не е експлицитно забранета, но може да влијае на вашата целокупна репутација, пренесува Фокс Бизнис. Тенсент, највредната компанија во Кина, има големи инвестиции или длабоки врски со програмерите на американските гејмерски компании како што се Епик Гејмс или Активижн Близард.

Компанијата основана од милијардерот Пони Ма се смета за еден од пионерите на интернетот и приватниот сектор во Кина.

За време на првиот мандат на Трамп, американската влада се обиде да ја забрани услугата за пораки и онлајн-услугите на Тенсент, платформата WeChat, која наводно ја загрозувала националната безбедност на САД.

CATL, најпознат по производството на батерии за електрични возила, ги снабдува и Тесла и најголемите светски производители како Стелантис и Фолксваген.

Потегот на Вашингтон може да ја наруши оваа соработка, пишува Блумберг.