Научниците се збогуваат со последниот глечер во Алгејските Алпи

Глечерот Шварцмилцфернер (Schwarzmilzferner) на австриската страна од Алгејските Високи Алпи го загуби статусот на глечер по овогодишното топло лето.

Топлите месеци му одзедоа повеќе од 4 метри во дебелина и околу половина од неговиот волумен, открија денеска истражувачите, пренесе ДПА:

– Голема е веројатноста тој целосно да исчезне до следното лето – изјави Кристоф Мајер, глациолог од Баварската академија на науките.

Веќе 26 години тој и неговите колеги внимателно го следат она што порано беше последниот глечер во Алгејските Високи Алпи од австриската страна, документирајќи значителни загуби на ледената маса од 2016 година.

– Овој тренд дополнително се интензивираше од 2022 година. Оттогаш беше јасно дека деновите на глечерот му се избројани – рече Мајер. Покрај дебелината и волуменот, клучен фактор за дефинирање на еден глечер е и тоа дали тој се движи (тече) – што повеќе не е случај ниту со Шварцмилцфернер.

Леденото поле, кое се наоѓа во близина на границата меѓу Австрија и Германија на надморска височина од околу 2.450 метри, во никој случај не е изолиран случај.

– Неколку помали глечери на Алпите исчезнуваат секоја година – рече Мајер, нарекувајќи го овој тренд речиси незапирлив.

– Дури и да има обилни врнежи од снег во зима, ледените маси забрзано се намалуваат. Летата сега станаа премногу топли за нив – изјави тој.

– Како што стојат работите, очекувам целите Источни Алпи да останат без лед помеѓу 2060 и 2070 година – истакна Мајер.