НАСА испрати погрешна команда и изгуби контакт со „Војаџер 2“
НАСА испрати погрешна команда и изгуби контакт со вселенско летало оддалечено 19 милијарди километри
НАСА не може да слушне никаков сигнал од Војаџер 2 откако изгубиле контакт со леталото, кое е оддалечено милијарди километри. Заминувајќи сè подлабоко во меѓуѕвездениот простор, Војаџер 2 изгуби контакт со Земјата откако контролорите на летот случајно испратија погрешна команда пред повеќе од една недела, поради што антената се навали подалеку од Земјата.
Антената на леталото се поместила само за 2%, но тоа било доволно за да се прекине комуникацијата. НАСА вчера објави дека нејзината огромна антена во Канбера бара залутани сигнали од Војаџер 2, кој е оддалечен повеќе од 19 милијарди километри, пишува Гардијан.
Во октомври леталото автоматски ќе се ресетира
Потребни се повеќе од 18 часа за сигналот од Војаџер 2 да стигне до Земјата од толку голема далечина. Војаџер 2 беше лансиран од Флорида во 1977 година за да го проучува надворешниот Сончев систем, како и Јупитер, Сатурн, Уран и Нептун. Беше лансиран само неколку недели пред неговиот идентичен близнак Војаџер 1. Влезе во меѓуѕвездениот простор во 2018 година, откако откри многуо нови месечини на Уран и една на Јупитер.
Во наредната недела, антената на Канбера исто така ќе ја „преплави“ околината на Војаџер 2 со правилна команда, надевајќи се дека ќе ја погоди целта, според лабораторијата за млазен погон на НАСА, која управува со мисиите на Војаџер. Во спротивно, НАСА ќе мора да почека до октомври за автоматско ресетирање на леталото, кое треба да воспостави комуникација.