Отворена истрага за четири одговорни лица во Еуростандард банка

Случајот со Еуростандард банка влезе на лената за истрага за криминал откако денес Јавното обвинителство соопшти дека е донесена е наредба за спроведување истражна постапка против четири лица за кои постои сомнение дека сториле кривично дело „предизвикување стечај на банка по член 181 ст.1 од Законот за банки и продолжено кривично дело – Перење пари и други приноси од казниво дело по член 273 ст. 6 во врска со член 45 од Кривичниот законик“. Обвинителството не објавува податоци за кои одговорни позиции се работи, ниту иницијали.

Наредбата за истрага е донесена од обвинител во Обвинителството за гонење на организиран криминал и корупција.

Обвинителството објаснува дека осомничените како лица со посебни права и одговорности во Еуростандард банка во периодот од 2018 година до 2019 година ги повредиле одредбите од Законот за банки, како и Методологијата за адекватност на капиталот.

„Како резултат на несоодветното работење на осомничените, органите на банката целосно затаиле во извршување на основните функции и со своите одлуки не постапиле по изречените мерки на гувернерот на НБРСМ, при што придонеле за дополнително влошување на профилот на ризик на банката. Воедно го зголемиле ризикот од концентрација и масовно ја затскриле реалната способност на клиентите за измирување на обврските и нереалната класификација, што резултирало со погрешно известување за финансиската состојба на банката и нејзините сопствени средства како кон НБРСМ, така и кон останатите заинтересирани страни“, наведува обвинителството.

Според соопштението, со ваквото работење осомничените придонеле за генерирање на големи материјални кредитни загуби, со што го намалиле износот на сопствените средства на банката и наметнале потреба од значителна докапитализација на банката, а притоа не извршувале капитализација по мерка изречена од гувернерот на НБРСМ. „

Сето ова придонело банката по сила на закон да биде во услови на стечај, што подразбира дека депозитите не може да бидат вратени во пари на доверителите, штедачите и депонентите на банката, со што банката била доведена во состојба на несолвентност. Така, од нефункционални изложености со состојба во време на отворање на стечајната постапка од нефункционални кредити за 149 правни лица била предизвикана штета од 3,37 милијарди денари, при што повластените кредитни должници со невраќање и неможност за присилно враќање на долг од кредитот се стекнале со корист, а штедачите и другите депоненти на банката биле оштетени.

Оттаму додаваат дека осомничените како лица со посебни права и одговорности во Еуростандард банка во периодот од 2017 година до 2020 година во повеќе наврати овозможиле отворање на нерезидентни трансакциски сметки преку кои дозволите трансакции и воспоставиле деловен однос со правни лица. Во соопштението се истакнува дека спротивно на нивната законска должност, иако имале обврска согласно Законот за спречување перење пари и финансирање тероризам, тие во Управата за финасиско разузнавање не пријавувале сомнителни трансакции кои укажуваат на перење пари, имот или имотна корист, а за што во Основното јавно обвинителство за гонење на организиран криминал и корупција во 2020 година започнале предистражни постапки.