Наместо канцеларии за фирмата незаконски изградил ексклузивен ресторан во под Пелистерието
БИТОЛА – Познат бизнисмен и угостител од Битола наместо да изгради објект за потребите на фирмата, тој од просторот направил луксузен ресторан за правење на свадби и свечености. Локацијата избрана за свадбените сали е на патот кој води кон Националниот парк Пелистер, под селото Дихово, каде во околината има и други големи сали за свадби и свечености, иако во околината доминираат и стоваришта. Во изминатите неколку години во оваа свечена сала биле организирани голем број на семејни и бизнис веселби.
Поради бесправното градење против бизнисменот, Основното јавно обвинителство од Битола покрена обвинение. Обвинението е поднесено во февруари годинава, речиси четириесетина дена пред големата трагедија во диското „Пулс“ во Кочани.
„Предметот е оформен врз основа на известување од СВР- Битола по извршени проверки по наредба на ОЈО Битола, а по повод пријава од граѓанин за наводни незаконитости при градба на други објекти во истиот реон. Предметот е оформен на 10 мај 2024 година во ОЈО Битола, и во однос на делот од објектот за кој покажувате интерес изграден без одобрение за градење на 6 февруари 2025 година веќе е поднесен обвинителен акт за чл.244-а од КЗ – Бесправно градење“, потврдуваат од ОЈО Битола за „Независен“.
Битолската полиција уште лани поднесе кривична пријава против фирмата од Битола и сопственикот поради постоење основи на сомнение за сторено кривичното дело бесправно градење.
Во извештајот стои – „СВР Битола поднесе кривична пријава против правно лице од Битола и М.Ј.(65) од Битола, сопственик на правното лице, поради постоење основи на сомнение за сторено кривичното дело „бесправно градење“. Пријавениот постапил спротивно на одобрение за градење издадено од општина Битола, за изградба на подружница на пријавеното правно лице, и изградил угостителски објект – ресторан, со што избегнал плаќање на повисоки надоместоци за уредување на земјиштето.“
Во комплексот каде е бесправната градба има и други објекти за свадби, па ОЈО Битола веќе работи на утврдување на фактичката состојба.
„Во однос на дел од објектите во кругот на ‘Гранд Премиер’ кои се изградени согласно одобрението за градење, поради сомнение дали тие објекти ги исполнуваат законските правила и прописи за заштита кои важат за угостителски објекти, предметот е препратен на 10 февруари 2025 година во надлежност на Дирекцијата за заштита и спасување, за нивно постапување согласно Законот за заштита и спасување и соодветните подзаконски акти. Обвинителството чека информација од ДЗСИ дали е постапено и што е утврдено во однос на овие објекти“, информираа од ОЈО Битола.
По разоткривањето на овој случај јавноста во Битола веќе го отвори прашањето дали и останатите објекти на оваа локација се легални и особено дали е легален ресторан на роднина на обвинетиот бизнисмен.
„Во врска со второто прашање, по поднесена кривична пријава од СВР Битола од 16 септември 2024 година поради сомнение за сторено кривично дело од 244-а од КЗ, Основното јавно обвинителство Битола оформи предмет и веднаш презеде дејствија за обезбедување докази. Во моментот, предметот е на градежно вештачење заради утврдување на фактичката состојба. Основното јавно обвинителство Битола оформи и посебен предмет, во рамките на кој веќе издаде задолженија и побара од Дирекцијата за заштита и спасување и од Градежната инспекција во Општина Битола да извршат детални проверки во рамките на своите надлежности на предметната локација која согласно урбанистичките планови е предвидена за стоваришни објекти, а во неа според сознанијата функционираат и угостителски објекти. По задолженијата се уште се постапува“, велат од ОЈО Битола. (А.Б)