Наградата „Книжевен жезол“ за 2023 година за поетите Весна Ацевска и Новица Ѓуриќ

Поетесата Весна Ацевска и поетот Новица Ѓуриќ од Црна Гора се годинешни добитници на наградата „Книжевен жезол“ што ја доделува Друштвото на писателите на Македонија.

Одлуката за лауреатите за 2023 година ја донесе Претседателството на Друштвото на писателите на Македонија (ДПМ) на вчера одржана седница. 

-Преку доделувањето на меѓународната награда „Книжевен жезол“ се прави мост меѓу македонската култура и јазик и другите култури и јазици, наведуваат од ДПМ.

Реномираната награда „Книжевен жезол“ за поетски опус што ја доделува ДПМ секоја година на еден домашен и на еден странски поет се врачува во јуни на манифестацијата „Празник на липите“ во Скопје. Исто така, оваа награда се крунисува со чествувањето на поетското творештво на лауреатите и се изразува преку објавување заедничка збирка поезија во рамките на традиционалната едиција на добитници на оваа награда.

Весна Ацевска (1952) е современа македонска поетеса.  Преведува од руски и од јужнословенски јазици. Објавила девет поетски збирки (Подготовки за претстава, 1985; Карпа за скок, 1991; Котва за Ное, 1994; Неред во огледалото, 1996; Кула во зборот, 2005; Столисник, 2008; Будност. Лотос, 2012; Од оваа страна, 2020; Преобразби, 2022) и единаесет поетски избори во земјата и во странство. Член е на Друштвото на писателите на Македонија, на Македонскиот ПЕН-центар, на Друштвото на литературните преведувачи на Република Македонија, на Интернационалното друштво „Калеваласеура“ од Хелсинки, Република Финска и на Славјанска литературна и уметничка академија во Варна, Република Бугарија.

Била член на редакциите на списанијата „Стожер“ на ДПМ и „Ревиењ“ на Македонскиот ПЕН-центар, а сега е уредник на „Книжевно житие“ на ИК „Макавеј“ од Скопје. Учествувала на разни книжевни фестивали, меѓународни книжевни средби и собири во земјава, како и во Бугарија, Грција, Романија, Србија, Турција и Хрватска. Нејзини песни се застапени во разни антологии и панорами на современата македонска поезија, подготвени од домашни и од странски редактори. За остварените резултати во поезијата, таа е носителка на наградите „Браќа Миладиновци“ на Струшките вечери на поезијата во 2009 година и на „Ацо Шопов“ на Друштвото на писателите на Македонија во 2012 година. За нејзиното литературно и преведувачко творештво ја има добиено државната награда „Свети Климент Охридски“.

Новица Ѓуриќ е поет, писател и новинар. Роден е 1956 година во Дријенка кај Колашин. Претседател е на Здружението на писателите на Црна Гора, а бил и претседател на Здружението на новинарите на Црна Гора. Неговото творештво е преведено на италијански, руски, германски, англиски, бугарски, шведски и на македонски јазик. Покрај поезија и проза, Ѓуриќ пишува и есеи и критки. Застапен е во 13 антологии и добитник е на 12 книжевни награди и седум награди за новинарство. Живее и создава во Подгорица, каде работи како новинар на весникот “Политика“. Објавил 25 книги со поезија, проза, есеистика и публицистика.