На мировниот концерт на ДУИ исвиркан македонскиот јазик

Концертот организиран од министерот за политички систем и односи меѓу заедниците Артан Груби по повод 21-годишнината од Охридскиот рамковен договор почна со исвиркување водителката кога се обиде најавата на прославата да ја прочита и на македонски јазик. Водителката на настанот прво зборуваше на албански, а кога се обиде истиот текст да го прочита и на македонски јазик беше исвиркана од младата публика. Таа се обиде овој текст да го прочита и на македонски: „Драги присутни, вечерва не собра песната, убавата песна која ќе не потсети на убавите мигови на животот, на младоста, љубовта, слободата, соништата. И секако да им порачаме на оние кои имаат некакви…“.

Вицепремиерот Артан Груби претходно за овој концерт најави дека ќе прерасне во еден од најголемите регионални, мултикултурни, обединувачки фестивали, но фестивалот, насловен како Фестивал на мирот помина без ниту еден македонски пејач, откако двајцата најавени, Владо Јаневски и Антонија Гиговска го откажаа настапот.