На Европа ѝ се заканува недостиг на гориво ако не биде одобрена зделката за имотот на „Лукоил“ , предупредува „Гунвор“

 Европа би можела да се соочи со проблеми со снабдувањето со гориво и губење на работни места доколку регулаторите не го одобрат договорот на „Гунвор Груп“ за преземање на меѓународните средства на „Лукоил“ за околу 22 милијарди долари, изјави извршниот директор и мнозински сопственик на „Гунвор“, Торбјорн Торнквист.

Според планот, шведската „Гунвор Груп“, со седиште во Женева, треба да ги преземе средствата на „Лукоил“ во Србија, Бугарија и Романија, мрежите на бензински пумпи во Европа и САД, како и нафтените и гасните полиња на Блискиот Исток и Централна Азија и Африка.

Имплементацијата на овој договор зависи од одобрувањето на американските, британските и швајцарските институции, а времето е ограничено бидејќи новите санкции на САД врз „Лукоил“ и „Роснефт“ стапуваат на сила на 21 ноември.

Во интервју за Фајненшл тајмс, Торнквист предупреди дека е клучно да се продолжат лиценците за работа за „Лукоил“, бидејќи во спротивно „капацитетот на рафинеријата би можел сериозно да биде нарушен“.

Рафинеријата на „Лукоил“ во Бургас снабдува повеќе од две третини од горивото во Бугарија, додека „Петротел“ во Романија обработува околу една третина од рафинирањето таму. Секое нарушување директно би влијаело на регионалната енергетска стабилност, рече тој.

Во меѓувреме, шведскиот милијардер Торнквист ги отфрли шпекулациите дека „Гунвор“ всушност ги презема средствата само привремено, а „Лукоил“ на крајот ги врати, нагласувајќи дека властите ќе бараат „целосен прекин на сопственичките врски“ со руската компанија.

Историските врски на „Гунвор“ со Русија дополнително ја комплицираат трансакцијата. Еден од коосновачите на групата е сојузникот на рускиот претседател Владимир Путин, Генадиј Тимченко, кој го продаде својот удел на Торнквист по воведувањето на санкциите во 2014 година.

„Гунвор“ постепено се повлекува од повеќето руски проекти, но ризиците за репутацијата остануваат, додаде ФТ.

Соединетите Американски Држави минатиот месец ги ставија „Лукоил“ и „Роснефт“ на списокот на санкционирани субјекти како дел од напорите за намалување на руските приходи за време на војната во Украина.

Затоа, завршувањето на трансакцијата бара одобрение од Канцеларијата за контрола на странски средства (OFAC) на Министерството за финансии на САД.