Милевски се повлекува од Владата, ќе го замени Ристо Пенов?
Во ЛДП, партијата чиј претседател е, се водат разговори за негов наследник во министерскиот ресор.
Горан Милевски идната недела ќе се повлече од функцијата министер за локална самоуправа во Владата.
Информацијата тој ја потврдил утрово за ТВ 21 и за Локално.
Cпоред неофицијални информации на Фокус, тој прво ќе се повлече од министерската функција, додека партиската функција ќе ја извршува до следниот редовен конгрес, што треба да се одржи до крајот на годинава.
Најсериозен кандидат за нов лидер на либералдемократите е пратеничката Моника Зајкова, која треба да ја презеде функцијата на редовниот конгрес што ќе се одржи до крајот на годинава, дознава Фокус.
Иако Милевски и пратениците Зајкова и Мојсоски имаа различен став во однос на таканаречениот француски предлог, партиски извори велат дека дискусиите за трансфер на власта во партијата се водат во конструктивна атмосфера, без тензии и конфликти.
Што се однесува до новиот министер за локална самоупава, соговорници на Фокус посочуваат дека во најтесна конкуренција се двајца кандидати, меѓу кои е и поранешниот партиски лидер и скопски градоначалник Ристо Пенов.
Инаку, Милевски го презеде управувањето со ЛДП во 2015 година, наследувајќи го Андреј Жерновски, кој премина во СДСМ откако му заврши мандатот како градоначалник на Центар.