Меркел: Европа и Германија се „на тенок мраз“ со индискиот сој

Зборувајќи за Германија, канцеларката Ангела Меркел утрово рече дека Европа е „на тенок мраз“ во борбата против корона вирусот, бидејќи многу заразната Делта варијанта се заканува да го поништи напредокот во намалувањето на инфекциите.

Асошиетед прес објави дека во она што може да биде нејзината последна декларација од владата до германскиот парламент, Меркел рече дека понатамошниот одговор на пандемијата ќе биде главна тема на дискусија меѓу лидерите на Европската унија на состанокот во Брисел во четвртокот.

Таа истакна дека бројот на случаи на Ковид во блокот од 27 нации продолжува да опаѓа, додека стапките на вакцинација се зголемуваат.

„Но и покрај тоа што има причина да се надеваме, пандемијата не е готова, особено во сиромашните земји во светот“, рече таа. „Но во Германија и Европа ние сè уште се движиме по тенок мраз“.

„Треба да останеме будни“, додаде Меркел. „Особено новонастанатите варијанти, особено сега варијантата Делта, се предупредување за нас да продолжиме да внимаваме“.

Здравствените службеници на ЕУ предвидоа во средата дека варијантата Делта ќе сочинува 90% од сите случаи низ блокот до крајот на август, што бара што повеќе луѓе да бидат вакцинирани во што е можно покусо време.

Во Германија, делтата варијанта сега сочинува околу 15% од новите случаи, според агенцијата за контрола на болести во земјата.