Мерц од Киев најави нов пакет помош за Украина од 1,3 милијарди евра
Киев, 4 октомври 2026 (МИА) – Германскиот канцелар Фридрих Мерц денеска од Киев го најави новиот пакет помош за Украина во вредност од повеќе од 1,3 милијарди евра, додека Русија ги интензивираше нападите врз украинските градови.
Околу една милијарда евра од тој пакет е воена помош, вклучувајќи оружје, борбени беспилотни летала и сателитска технологија, „за да може Украина да ги гаѓа и руските лансирни рампи“, рече Мерц на прес-конференција.
Германија, исто така, обезбедува околу 350 милиони евра помош за енергетскиот сектор пред зимата, наменети за агрегати, трафостаници и поправки, рече тој.
Украинскиот претседател, Володимир Зеленски, изјави дека двете земји потпишале и 15 договори во вредност од повеќе од 8,5 милијарди евра, кои главно се однесуваат на соработка во областа на безбедноста, производството и набавката на оружје, како и на проширувањето на заедничките активности за борба против беспилотни летала.
На прес-конференцијата, Зеленски рече дека посетата на Мерц во времето на руските напади е „важен сигнал за поддршка на Украина и храброста на Германија и цела Европа“.
Германија ќе го финансира заедничкото производство на беспилотни летала дизајнирани да пресретнуваат руски беспилотни летала со млазен погон, рече Мерц, додавајќи дека „значајните технички напредоци“ направени во последните недели го забрзуваат производството.
„Тоа брзо и опипливо ќе ја зајакне воздушната одбрана на Украина и дека зајакнувањето е итно потребно“, рече тој.
Зеленски ја обвини Москва дека избегнува суштински мировни преговори, додека изјави дека Украина и Германија работат на подобрување на дипломатијата со учество на Европа.
Германија е најголемиот донатор на Украина, испраќајќи повеќе од 43,3 милијарди евра (48,8 милијарди долари) во Киев од почетокот на војната, како и опрема и оружје.
Мерц и Зеленски, исто така, ја посетија зградата на Националната академија на науките на Украина во центарот на Киев, која беше оштетена во рускиот напад во кој загинаа две лица во понеделник