Луѓето околу Путин не веруваат дека Украина е вмешана во терористичкиот напад

Официјални лица блиски до рускиот претседател Владимир Путин не веруваат дека Украина е поврзана со нападот на радикалните исламисти врз концертната сала „Крокус“, пишува Блумберг.

Според четири извори блиски до Кремљ, нема докази за вмешаност на Киев во терористичкиот напад и Путин го знае тоа затоа што тој лично присуствувал на дискусиите каде што официјалните лица дошле до овој заклучок. И покрај тоа, тој сепак има намера да ја искористи трагедијата за да ги принуди Русите да се соберат околу војната во Украина, рече еден од соговорниците на агенцијата.

Изворите додаваат дека речиси ниту еден од претставниците на руската политичка и бизнис елита што ги познаваат не верува дека Украина стои зад терористичкиот напад во „Крокус“. Тие, исто така, истакнаа дека Кремљ „е шокиран од неуспехот на ФСБ да спречи вооружен напад врз луѓето кои дојдоа на концертот“, иако безбедносните сили имаа време да преземат акција со оглед на тоа што Соединетите Држави ги предупредиле за заканата однапред. .

Двајца соговорници на агенцијата тврдат дека во врска со овој неуспех, некои функционери може да бидат разрешени. Се очекуваат и реконструкции во раководството на безбедносните сили.

Путин двапати се обиде да ја поврзе Украина со најсмртоносниот терористички напад во Москва во повеќе од 20 години, со кој започна неговиот петти претседателски мандат, иако групата Исламска држава ја презеде одговорноста за нападот.

Еден ден претходно, тој рече дека нападот го извршиле радикални исламисти, но нивните наредбодавачи треба да се бараат во Украина и меѓу оние „кои се борат“ со Русија од 2014 година „во рацете на неонацистичкиот режим во Киев“. Претседателот, исто така, изрази незадоволство од фактот што САД „се обидуваат да ги убедат своите сателити и другите земји во светот“ дека нема „киевски трага“ во терористичкиот напад во Москва и за сè ја обвинува ИСИС. Тој ги нарече предупредувањата на Вашингтон дадени пред трагедијата „уцена“ и „провокација“ со цел „заплашување и дестабилизација на општеството“.

Ден по нападот, Путин рече дека Украина организирала „прозорец“ на државната граница за бегство на терористите. Не постои директен доказ за ова. Путин и безбедносните сили се осврнуваат на фактот дека милитантите биле приведени во областа Брјанск, но во близина е и границата на Белорусија, чиј претседател Александар Лукашенко изјави дека напаѓачите на „Крокус“ планирале да избегаат во неговата држава, но поради зголемената безбедност „се свртеа и отидоа на делот на украинско-руската граница“.

Во меѓувреме, верзијата на Путин за вмешаноста на Украина и „англосаксонците“ во терористичкиот напад активно ја промовираат „јастребите“: секретарот на рускиот Совет за безбедност, Николај Патрушев, и шефот на ФСБ, Александар Бортников. Последниот изјави дека „наодите“ до кои дошле разузнавачките служби наводно укажуваат дека зад овој напад стојат САД, Велика Британија и Украина. Кругот на осомничени ќе се прошири, нагласи тој.

Иако ќелијата на ИСИС во Авганистан ја презеде одговорноста за нападот, во кој загинаа 139 лица, по изјавите на Путин и Бортников, разузнавачките служби немаат друг избор освен да ја докажат вината на Украина и на Западот, изјави Андреј Солдатов, експерт за ФСБ и руското разузнавање.

Тврдењата на Путин и високите безбедносни функционери за вмешаноста на Киев, кои ги следат провоените блогери и државните медиуми, се поврзани со обидите на Кремљ да ја „оправда инвазијата на Украина“ и да ја претстави како „егзистенцијална закана за Русија“, според на аналитичарите од Американскиот институт за проучување на војната.

Како резултат на тоа, руското раководство „очигледно ги игнорира“ заканите што ИСИС и ги претставува на земјата и дава предност на ПР ефектот, смета Институтот: „Очигледно, Кремљ одлучи дека информациската вредност на обвиненијата против Украина е вредна за какви било безбедносни ризици и човечки жртви“.