Лагард очекува да остане во ЕЦБ до крајот на мандатот

Кристин Лагард очекува да остане на чело на Европската централна банка (ЕЦБ) до крајот на нејзиниот мандат во октомври следната година, изјави таа за Волстрит журнал (WSJ) во четврток, отфрлајќи ги медиумските извештаи дека можеби ќе замине предвреме.

Во среда, Фајненшл тајмс објави дека Лагард планира да се повлече од функцијата шеф на ЕЦБ пред крајот на нејзиниот мандат и пред француските претседателски избори во 2027 година, за да му даде можност на францускиот претседател во заминување, Емануел Макрон, да го избере својот наследник.

– Кога ќе се осврнам на сите овие години, мислам дека постигнавме многу, јас постигнав многу, изјави Лагард за WSJ.

– Треба да се консолидираме и да се осигураме дека ова е навистина солидно и сигурно. Затоа, мојот основен став е дека ќе го завршам мојот мандат, додаде таа.

Ројтерс ексклузивно објави во четврток дека Лагард испратила приватна порака до колегите подоцна во среда, уверувајќи ги дека сè уште се концентрира на својата улога како шеф на ЕЦБ и дека ако сака да се повлече, ќе го чујат тоа од неа, а не од медиумите.

Во интервју за WSJ, шефицата на ЕЦБ одби да коментира за извештајот на Фајненшл тајмс, а нејзиното интервју ги потисна шпекулациите дека ќе замине порано.

Лагард изјави за американскиот весник дека нејзина задача е да обезбеди ценовна и финансиска стабилност, како и „да го заштити еврото, да се осигури дека е цврсто, силно и подготвено за иднината на Европа“.

Минатата сабота, ЕЦБ презентираше план кој треба да обезбеди ликвидност во евра за централните банки ширум светот и да го отвори патот за зголемена употреба на заедничката европска валута во глобалната трговија.

Досега, ЕЦБ обезбедила пристап до репо линии само за Унгарија, Романија, Албанија, Северна Македонија, Црна Гора, Косово и Сан Марино, според податоците на официјалната веб-страница на банката.

Затоа, банката ќе им обезбеди пристап до репо аранжмани на сите централни банки ширум светот од третиот квартал од оваа година, под услов да не се исклучени од причини поврзани со репутацијата, како што се перење пари, финансирање на тероризам или меѓународни санкции.

Инструментот сега ќе им обезбеди постојан пристап до износ од 50 милијарди евра. Досега, тие имаа склучено договор за пристап за ограничен временски период.

Целта на оваа промена е да се обезбеди поголема флексибилност на инструментот, неговата географска распространетост и неговата релевантност за глобалните иматели на хартии од вредност деноминирани во евра, се вели во соопштението на ЕЦБ.

Инструментот ќе им овозможи на заемодавателите кои не можат да добијат пари на пазарот да позајмуваат евра од ЕЦБ во замена за висококвалитетен колатерал, со обврска да го вратат во одреден период, заедно со камата.

Зборувајќи на Минхенската конференција за безбедност, Лагард рече дека „ЕЦБ мора да се подготви за средина која нема да биде толку стабилна како што беше досега“.

– Мора да избегнеме ситуација во која овој стрес би можел да предизвика бран на продажба на хартии од вредност деноминирани во евра на глобалните финансиски пазари, што би можело да го попречи преносот на нашата монетарна политика, објасни таа.