Критичарот на Путин, кантавторот Вадим Стројкин, паднал од прозорец и умрел

Рускиот кантавтор Вадим Стројкин, познат по јавните критики за војната во Украина, почина откако падна од прозорец за време на рација во неговиот стан, објави организацијата за човекови права ОВД-Инфо. Според достапните информации, Стројкин починал на лице место, пренесува независниот руски портал Медуза.

Според извештаите на руските медиуми, полицијата го посетила домот на Стројкин како дел од истрагата за наводното финансирање на украинската војска.

Според Телеграмскиот канал Mash on Moike, Стројкин побарал да отиде во друга просторија за време на испрашувањето, каде потоа го отворил прозорецот и скокнал.

„Во текот на истрагата, човекот нашол изговор да отиде во друга просторија, каде брзо го отворил прозорецот и презел неповратна акција“, рекол истиот извор, сугерирајќи дека се работи за самоубиство.

Руските истражни органи отворија официјална истрага за околностите на смртта на Стројкин, јавуваат домашните медиуми.

Стројкин претходно јавно ја осуди инвазијата на Украина, а во 2022 година објави порака на социјалната мрежа ВКонтакте во која отворено се спротивстави на војната што ја започна Кремљ.