Кристалина Георгиева: Приклучувањето кон еврозоната е логичен чекор за Бугарија

 На прашањето дали Бугарија треба или не треба да влезе во еврозоната, би одговорила со друго прашање: Има ли некој во Бугарија што сака да падне Валутниот одбор. Ова го изјави директорката на Меѓународниот монетарен фонд Кристалина Георгиева, на која денеска и беше доделена почесната титула „Doctor Honoris Causa“ на Универзитетот за национална и светска економија (UNWE), пренесува БГНЕС.

– Досега не сум видела социолошки анкети дека јавното мислење е расположено да падне Валутниот одбор и да бидеме на ветрот без заштитата што тој ни ја дава. И бидејќи ние сме Валутен одбор и нашата валута е врзана за еврото, за нас е многу подобро да учествуваме во формулирањето на политиките што ја засегаат нашата земја отколку да не учествуваме, рече директорката на ММФ.

Кристалина Георгиева посочи дека влезот во еврозоната е логичен чекор за Бугарија.

Таа се согласи дека условите за влез на Бугарија во еврозоната денес се покомплицирани отколку пред неколку месеци, бидејќи инфлацијата во Бугарија надмина 10 проценти.

– Сепак, тоа не е поради внатрешни грешки во земјата, туку поради надворешни шокови од пандемијата и војната во Украина, а овој проблем со растот на цените ги погодува буквално сите земји освен Јапонија и неколку азиски земји. Значи, многу е веројатно дека Европската централна банка и министрите од еврозоната ќе го земат предвид фактот дека растот на цените и инфлацијата во Бугарија се предизвикани од надворешни фактори и тоа нема да влијае на рокот за влез во земјата, потенцираше Георгиева.