Кредит од еден милион евра од ЕИБ заглавен во Советот на Битола
Мнозинството во битолскиот совет гласаше воздржано за кредитот кој треба да биде употребен за седум проекти во општината
БИТОЛА – Мнозинството советници во битолскиот Совет гласаше воздржано за кредит од 1 милион евра од Европската инвестициска банка наменет за седум проекти за Битола. Со овие пари треба да се реконструираат водоводните мрежи и канализации на пет улици меѓу кои и Булеварот „1 мај“, изградба на водноснабдителен систем за село Лисолај и изградба на фекална канализација за потпелистерското село Трново, во втора фаза.
Советници на СДСМ и коалицијата, Левица и „Поинаку“, вкупно 16 гласа беа воздржани, додека 13 советници на ВМРО-ДПМНЕ гласаа „за“ прифаќање на две точки кои требаше да поминат преку Советот во врска со грантот.
„Предлагам точките да не се гласаат и тие да бидат образложени на Комисија за финансии во текот на оваа недела, ако се итни можеме да ги поминеме на вонредна седница. До овој момент немаме никаква информација“, рече претседателката на Советот, Габриела Илиевска непосредно пред гласањето.
Лани во ноември новата влада објави дека нови 50 милиони евра, кредит од Европската инвестициска банка, кои биле обезбедени, но не и искористени, ќе им бидат на располагање на општините. Првиот вицепремиер и министер за животна средина, Изет Меџити кажа дека се работи за средства кои се добиени во времето на претходната власт, но досега не се реализирани, а се наменети за еколошки проекти, за хортикултурно разубавување на општините и за подземна инфраструктура – канализации, водоводи. Меџити рече дека –„Парите се веќе добиени, плаќаме и камата, но не се искористени.“
На советничката расправа, образложението на советниците од ВМРО-ДПМНЕ беше дека државата зела заем, а не дека ќе земе Општина Битола. Односно дека за реконструкција на водоводни линии и канализациони мрежи проектите ќе се одвиваат со тендери преку Министерството за животна средина, а битолскиот Совет треба да даде согласност за градоначалникот Тони Коњановски да го потпише договорот со Министерството за животна средина.
„Доделени ни се милион евра од заемот и треба да ги искористиме. Сите општини земаат финансиски средства. Очигледно се нема желба да се искористат овие финансиски средства. И да не ги искористиме овие средства ќе треба да го враќаме заемот. Функционираат тие водоводни линии и канализациски мрежи, само што се стари и дотраени, имаме дефекти. Сега зборуваме за нови водоводни и канализациски мрежи“, образложи Бојан Бојкоски од ВМРО-ДПМНЕ.
Илиевска рече: „Не ни се доделени, некој ќе треба да ги враќа. Сега зборуваме дали сакаме да се дозаглавиме. Инвестициска банка ја лажите дека имаме рентабилни јавни претпријатија… Како ќе си гласам е мое лично убедување, не можете да ми вршите притисок“, реча таа во текот на расправата.
Ситуацијата со заемот од Европската инвестициска банка најде паралела и со европските пари што во 2023 година требаше да бидат наменети за нови велосипедски патеки во Битола во висина од 400 илјади евра, но Советот не даде зелено светло да се искористат. Општината сега ги прави од својот буџет.
„Значи градоначалникот не може да потпише ништо без одобрение на Совет, така?“, праша Илиевска.
Бојковски одговори:„Така побарува сега донаторот“.
На ова Илиевска додаде: „Така побаруваше и за велосипедските патеки, па си потпиша анекс на договор без одобрение на Советот“, рече таа.
Нејасно за што се зема заемот беше и за СДСМ. Советникот Петар Николовски, побара увид во проектот.
„Го бараме договорот за грант меѓу Општина Битола и Министерството за животна средина за да знаеме што гласаме за да не биде после дека сме против европски пари, заедно да донесеме одлука за доброто на градот“, рече Николовски.
Советничка од Демократскиот сојуз на Власите, Елизабета Тодоровска праша што ако некој од водоводните проекти не биде ставен во функција тогаш кој ќе ја надомести штетата. На ова Бојкоски рече дека се работи за веќе постојни линии на водоводот кои се функционални.
Откако за заемот не се даде зелено светло од Советот, Бојкоски излезе на булеварот и обвини дека „ваквото одбивање и деструктивно однесување се случува по втор пат за проекти финансирани од ЕУ.“
Денеска јавно реагираше и градоначалникот Тони Коњановски велејќи дека е разочаран и дека е веќе видена состојба на надмудрување во Советот на општина Битола – „добиваме наше битолско одбивање на средства од Европската унија. Оваа постапка е веќе еднаш видено во општинскиот Совет, за одбивање на средства од Европската Унија. Не е добро ова однесување. Сите губиме на овој начин“, рече Коњановски.