Ковачевски – Штајнер: Поддршка од ОН за Македонија како регионален центар на зелена енергија

Премиерот  Димитар Ковачевски, придружуван од вицепремиерот за европски прашања, Бојан Маричиќ, во Њујорк се сретна со Ахим Штајнер, администратор на Програмата за развој на ОН (UNDP) и копретседавач на механизмот за енергија на ОН (UN Energy). На состанокот беше потенцирано значењето на ОН и на развојните мрежи на организацијата, како што е УНДП, која им помага на земјите членки во остварувањето на милениумските развојни цели, глобалниот развој, заштитата на животната средина, во областа на енергетиката и друго.

Премиерот Ковачевски притоа изрази поддршка на повикот на  Штајнер за зголемување на инвестициите во обновлива енергија и осигурено напојување на економиите денес и во иднина и посочи на ефикасните чекори што ги презема Македонија во енергетската транзиција и диверзификација, што придонесе во справувањето на земјата со енергетската криза и во градењето отпорност на регионот. Во таа насока, премиерот Ковачевски соопшти дека Северна Македонија од почетокот на минатата година досега има издадено 600 лиценци за централи за обновливи извори на енергија, со што во државата денес на мрежа има 420 мегавати на централи што доминантно работат за производство на електрична енергија од сонцето, а очекувањата се дека до крајот на годината тој капацитет да достигне 600 мегавати.