Костадинов: Ја бранам семејната чест, а не повикувам на убиство на Латас

Градоначалникот на Струмица кој предизвика многу реакции во јавноста по објавата за навредите од новинарот Драган Павловиќ – Латас, повторно се обрати на Фејсбук и испрати пораки кон ВМРО-ДПМНЕ по критиките од партијата. Тој го потсетува ВМРО-ДПМНЕ по одбраната на новинарот дека дека тој се обратил за да ја одбрани честа не од „новинарот“ туку од „човекот“ Д.П. Латас за кого Струмица била  бугарски град.

„Јас пишував за одбрана на честа, за семејството, за вистината. И ќе го правам тоа секогаш – гласно, исправено и достоинствено“, вели во обраќањето на Фејсбук Костадин Костадинов.

„Кога ВМРО-ДПМНЕ одлучува да го стави во одбрана новинарот Драган Павловиќ -Латас, треба прво да се погледне во огледало и да се праша: кого точно штити и на чив грб го прави тоа?

– Истиот Латас, кој во својот подкаст ја нарече Струмица „бугарски град“.

– Истиот Латас за кој постојат долго време јавни сомнежи, не само за злоба, туку и за сериозни обиди за сексуално насилство.

– Истиот Латас кој денеска е гласноговорник на една партија, но и нејзин срам.

Во мојата објава немаше ниту збор за насилство, ниту повик за убиство. Тоа можел да го види само човек што во себе го носи тој мрачен нагон. Јас пишував за одбрана на честа, за семејството, за вистината. И ќе го правам тоа секогаш – гласно, исправено и достоинствено.

Моите зборови не беа упатени кон новинарот Латас, туку кон ‘човекот’ Д.П. Латас.

Предлагам ВМРО-ДПМНЕ сериозно да се преиспита и да најде начин како ќе им објасни на граѓаните на Струмица, на цела Македонија – зошто стои зад човек што вели дека нашиот град е бугарски?“, вели Костадинов.