Ќе има неколку имиња на црната листа во наредните месеци, вели амбасадорката Агелер

Американската амбасадорка Анџела Агелер ги стави во една помала рамка овдешните очекувања за лицата од македонија кои би можеле да се најдат на црната листа на САД. Во интервју за Телма Агелер рече дека „моите очекувања се дека во следните месеци ќе видиме неколку имиња, но не знам која е точната временска рамка“. Таа даде и прецизно објаснување кој ја составува листата на санкции – дека тоа нема никаква врска со македонската јавност, туку дека тоа го прават американските институции и американскиот тим во амбасадата. Агелер појасни дека нема само една листа на санкции, туку повеќе.

Што кажа во одговорот Анџела Агелер?

„Не постои само една листа. Прашањето не е дека САД ќе објават една листа и ќе кажат ‘тоа е тоа, ова се сите имиња’. Ова е долготраен и постојан разговор помеѓу американската амбасада овде и Вашингтон, и ширум владата во Вашингтон. Има повеќе видови листи за санкции, значи не постои само една, и не станува збор дека се прави една листа и завршуваме. Бидејќи има постојана проверка за оние кои ние сметаме дека ги прекршиле правилата во поглед на очекувањата кои ги имаат САД за тоа дали да им дозволи влез во САД, или да се соочат со други видови на финансиски санкции. Некои ги води Стејт департментот, некои ги води Министерството за финансии, и други агенции исто така. Немам временска рамка, бидејќи Вашингтон ќе ги објави кога ќе ги заврши истрагите и заклучоците. Моите очекувања се дека во следните месеци ќе видиме неколку имиња, но не знам која е точната временска рамка. Да бидам јасна – за тој разговор кој го водиме, кој јас го водам, кој мојот тим овде го води со Вашингтон, не бараме мислења на луѓе од оваа земја. И, верувајте ми, откога дојдов овде луѓе имаат пријавено многу, многу имиња во оваа амбасада, на луѓе кои ги прекршиле правилата, и кои треба да бидат на некоја од листите за санкции. Ние секако дека ги разгледуваме тие. Би ги замолила луѓето за трпение, но исто така и да сфатат дека ова е постојан процес.

Мислам дека ова е можност за правосудството сериозно да се погледне себеси, дали сте судија, или обвинител, која и да е вашата улога, и да се запрашате ‘дали јас се однесувам, дали си ја извршувам работата со интегритет? Дали сум под влијание на други? Дали носам одлуки засновани врз законот?’ Мислам дека сите можеме да посочиме кон неодамнешни примери каде што не ни се чини нам, или на јавноста, дека тоа се случило. Значи продолжуваат да се појавуваат примери кои изгледаат многу сомнително, пак ќе повторам, не само на САД и на амбасадата, туку и на обичните луѓе, кои сакаат да продолжат со своите животи знаејќи дека нивната влада, дека нивните политичари дејствуваат во најдобар интерес за нив. Во најдобар интерес за граѓаните, а не во нивниот личен најдобар интерес, на судијата, на обвинителот, или на кој било“, рече амбасадорката Агелер.