Изгаснат пожарот што го оштети нафтениот танкер во Балтичкото Море

Пожарот што вчера оштети танкер со нафта во Балтичкото Море, беше изгаснат во пристаништето Росток по голема операција, соопшти рано утрово германската централна команда за поморски вонредни состојби.

Како што пренесува ДПА, 73-метарскиот „Аника“, за кој командата соопшти дека превезувал 640 тони мазут кога на бродот избувна пожар рано вчера, по петчасовна операција беше одвлечен до пристаништето Росток со два шлепери. Товарот на бродот не бил зафатен од пожарот.

Пожарот првично бил локализиран во моторната соба додека бродот бил на море на околу 4,5 километри од германскиот брег во близина на Росток, со три противпожарни чамци кои се бореле со огнот. Според Централната команда за поморски вонредни ситуации, 120 лица биле ангажирани за справување со инцидентот.

Сите седум членови на екипажот на „Аника“ се пуштени од болница уште синоќа, откако претходно истиот ден беа изнесени на брегот.

Поморската команда соопшти дека се уште не е позната причината за пожарот.

Бродот патувал од северното пристаниште Росток кон Травемунде кога избил пожар на неговата крма.

Според првичните информации од министерството за животна средина на Мекленбург-Западна Померанија, засега нема загадување на водата. Сепак, превентивно се постави нафтена бариера околу Аника во пристаништето, соопшти командата за поморски итни случаи.