И пожарот во Галичник причина за вербална престрелка меѓу СДСМ и ВМРО-ДПМНЕ

Коце Трајановски, Никола Груевски и неговиот чувар на партиската фотелја Мицкоски забораваат дека по дведецениското управување на ВМРО-ДПМНЕ со Скопје го оставија главниот град не само без функционална противпожарна опрема, туку и со криминални милионски трошоци на лесно запалливи фасади од евтин стиропор, се вели во реакцијата на СДСМ на фејсбук статусот на Христијан Мицкоски, претседателот на ВМРО-ДПМНЕ.

„Тие не мислеа ниту на безбедноста на објектите од ‘Скопје 2014’, чии фасади беа преоблечени со евтин стиропор, ниту на зградите за кои беше употребен истиот материјал. Тие мислеа само како да ги наполнат своите џебови и како ВМРО-ДПМНЕ да стане партија со најголем имот во Европа. Затоа е апсурдно што сега Христијан Мицкоски го обвинува Шилегов за гаснењето на пожарот во Галичник, село кое е два часа оддалечено од Скопје, во општината Маврово Ростуше и зошто набавил противпожарна автомеханичка скала од Будимпешта за Скопје.

Наместо Мицкоски да ја тормози јавноста со лаги и конструкции, треба да им објасни на скопјани зошто ВМРО-ДПМНЕ не набави противпожарна автомеханичка скала за потребите на Скопје иако имаше мнозинство во Советот на градот повеќе од две децении.

Скопјани се уморни од вашите лаги и конструкции, од вашите злоупотреби на пожари и трагедии, и знаат да оценат кој придонесува за безбедноста на скопјани со противпожарна опрема, а кој ја загрозува со ‘инвестиции’ во запалливи фасади од евтин стиропор“, се вели во реакцијата на СДСМ.

Претходно лидеро на ВМРО-ДПМНЕ преку Фејсбук статус го нападна градоначалникот Шилегов дека купил пожарникарска скала (всушност возило) за 1,7 милиони евра, исповоциран од пожарот во Галичник каде што според него се гасело со опрема од  20 век.

„Вчера гореше над Галичник, а се гасеше со опрема од 20 век во земја кандидат за Европска Унија во 21 век. Благодарение на пожртвованоста на пожарникарите и армиските волци, пожарот е ставен под контрола, напиша  Мицкоски.

„Во меѓувреме Петре Шилегов набави противпожарна автомеханичка скала вредна нешто повеќе од 1,7 милиони евра. Носител на набавката е унгарска компанија… Додека врви бизнисот, а шумите горат, како партнер на унгарската компанија се јавува истата компанија каде е косопственик зетот на секретарот на град Скопје. Чудно но вистинито, компанијата каде е косопственик зетот на најблискиот соработник на Петре Шилегов склучува договор со носителот на набавка во вредност од 33.244.500 денари или околу 540.000 евра. А да…, сигурно штабски без основа град Скопје ќе демантира  дека во периодот од 2012 и 2017 истата компанија добила тендери во времето на ВМРО-ДПМНЕ, нешто помалку од 150.000 евра (иако не во тоа време, туку денес, снаата е секретар на градот, а компанијата ќе демантира дека има странски капитал од 2017 година и не бил зетот на најблискиот соработник на Петре Шилегов единствен сопственик). Во деновите што следат ќе откриваме се повеќе сомнежи за сторен криминал на Петре Шилегов и ќе гледаме штабско препелкање во обид да се одбранат…, но крајот се ближи, а со крајот и одговорноста следи“, обвинува Мицкоски.

Со реакција се јави и Шилегов.

Додека ти Христијане ја замараш македонската и скопската јавност со своите лаги и конструкции, ние веќе правиме обука на персоналот и вршиме технички прием на противпожарната скала, новото добро во нашиот град. Прав си. Ти одиш во Будимпешта по инструкции, некој друг по опрема за безбедноста на скопјани, потенцира Шилегов во објавата на Фејсбук.