Холивудски актер осуден на две години: Сексуално злоставувал три жени

Гари Бузи, номиниран за Оскар и познат по улогата во филмот „Point Break“, е осуден на две години условна казна за сексуално дело.

Американскиот актер Гари Бузи, номиниран за Оскар и познат по улогата во „Point Break“, е осуден на две години условна казна за сексуално дело извршено во 2022 година на филмска конвенција во американската држава Њу Џерси.

Бузи беше прогласен за виновен за несоодветно допирање на жена за време на конвенцијата за хорор филмови „Monster-Mania“, која се одржа од 12 до 14 август 2022 година во хотелот „Doubletree“ во Чери Хил. За време на настанот, Бузи беше обвинет за несоодветно допирање на најмалку три жени, вклучително и обид за откопчување на градник за време на заедничко фотографирање.

Бузи одби да зборува за време на сослушувањето, велејќи дека „дејствува по совет на својот адвокат“.

Неговиот адвокат побара актерот да биде казнет само со парична казна, земајќи ги предвид неговата возраст и здравје, но судијата сепак одлучи да му изрече условна казна од две години. Одлуката на судот ја зеде предвид сериозноста на инцидентот, како и претходните контакти на Бузи со правосудниот систем.

Покрај условната казна, на актерот му е забрането да има каков било контакт со жртвите. Исто така, му беа дадени 45 дена да поднесе жалба на пресудата.

Иако првично ги негираше обвинувањата, Бузи во јули се изјасни за виновен по едно обвинение за сексуален контакт од четврти степен.