Градежната инспекција од Битола удри по дивоградбите во Потпелистерието
БИТОЛА – Градежната инспекција во Општина Битола покрена постапки за три објекти во Потпелистерието, а за уште еден врши контрола врз документацијата. Општина Битола денеска и со фотографии ги објави дивоградбите од кои две се во Нижеполе, а едната во близина на населбата Довлеџик на излезот од Битола од страната на Охрид.
Градоначалникот Тони Коњановски објави дека –„Законот мора да биде еднаков за сите нас“.
„При инспекциски надзор од страна на одделението за градежна инспекција при Општина Битола, за три објекти утврдени се неправилности и преземени се соодветни мерки. Два од објектите се наоѓаат на патот за Ниже поле, а еден кај населбата Довлеџик. Кај последниот објект констатирани се работни активности за монтажа на настрешница – челична конструкција, без претходно обезбедено одобрение за монтажа од Општина Битола. Изготвен е записник за констатираната состојба, а градбата е стопирана“, информира Општина Битола.
Еден од објектите освен приложениот имотен лист, не поседувал никаква друга документација за градбите. Градежната инспекција за нелегалните градби најавува решение за рушење.
„На патот за Нижеполе вчера бил извршен вонреден инспекциски надзор, констатирано е дека се гради објект од челични профили и покривка од панели, а исто така на друг дел од парцелата се изведува конструкција од бетонски столбови, кровна конструкција од челични профили и покривка од панели, без претходно прибавено одобрение за градење издадено од градоначалникот на Општина Битола“, стои во извештајот на инспекцијата
И кај другиот објект на излезот од Битола, ќе бидат преземени истите мерки. Во овој случај, констатирано е дека објектот е дивоградба, а истиот бил изграден пред десетина години, како хала од челична конструкција покриен со панели и приклучен на електрична мрежа.
Од страна на градежната инспекција, извршен е увид на уште еден објект во Дихово, за кој се прибира документација.
Од Општина Битола велат дека во изминатите три години, општинскиот инспекторат, бележи значително зголемен број на постапувања на терен, вклучувајќи ги и постапувањата при отстранувањето на нелегално поставените објекти – диви гаражи и хаварисани возила на јавни површини.
Во 2022 година, во Сектор општински инспекторат е постапувано по вкупно 1751 претставки, пријави и барања и тоа: во одделението за комунална инспекција, инспекција за животна средина и инспекција за домување, постапувано е по 1.178 предмети, градежна инспекција, инспекција за патен сообраќај и патишта, постапувано е по 450 предмети, претставки дописи и слично, а во одделението за инспекција за приходи, туризам, угостителство, образование и спорт, постапувано е по 123 предмети.
Во 2023 година, постапено е по 1.870 претставки, пријави и барања од кои: одделението за комунална инспекција и инспекција за животна средина имало 1.285 предмети, градежна инспекција, инспекција за патен сообраќај и патишта 503, а инспекцијата за туризам, угостителство, образование и спорт, постапила по 82 предмети, информираат од општината.
Во 2024 година, Секторот општински инспекторат постапил по вкупно 1.559 претставки и барања, од кои: одделението за комунална инспекција и инспекција за животна средина постапило по 1.038 предмети, градежна инспекција, инспекција за патен сообраќај и патишта по 347, а инспекцијата за приходи, туризам, угостителство, образование и спорт по 174 предмети. (А.Б)