Ѓоко Танески по 30 години кариера со прв концерт на Антички во родниот Охрид

В сабота, на 20 јули , во 21 часот, сите патишта водат кон охридскиот Антички театар каде Ѓоко Танески со солистички концерт ќе го одбележи својот голем јубилеј – 30 години кариера.

Танески вели дека е среќен што по 30 години музичка кариера, ќе одржи концерт во Античкиот театар .

 

„Сум имал доста концерти и настапи во мојот град, но никогаш на Антички. Едноставно, коцките не се поклопиле, но дојде време да си ја исполнам и таа желба“, вели поп-пејачот.

Концертот е насловен „Најдоброто од Ѓоко Танески”, а охриѓанецот со златно грло на сцената ќе ги отпее најголемите хитови од својата кариера. „Никогаш доста”, „Збогум најмила”, „Една љубов имам”, „Цветај расцветај”, „Ден по ден“… „Јас ја имам силата“, која ја испеа на Евровизијата во Осло во 2010, …се само дел од хитовите кои ја одбележаа неговата 30-годишна кариера, а кои ќе бидат дел од репертоарот.

Како што е предвидено Ѓоко ќе отпее 20 свои песни, три народни, охридски композиции во придружба на еден од неговите гости Николче Мицевски, кој ќе го придружува на клавир, но ќе промовира и една нова песна.

„Подготвив навистина интересен репертоар и освен моите добро познати песни ќе отпеам и три убави охридски, народни песни, но премиерно ќе отпеам и две нови. Едната е забавна, онака во мој стил, се вика „Чекам, чекам” и е со потписот на Николче Мицевски. Втората е народна, насловена е „Над изворот”, а ја потпишува Влатко Јовчевски“, вели Ѓоко, кому ова му е прв голем концерт во родниот Охрид.

Освен Николче Мицевски на сцената ќе го придружува и Камерниот оркестар од Битола, а гостин ќе му биде и легендарниот Драган Мијалковски, кој ќе гостува со три нумери.

Организаторот Фреш унион, најавува вистински музички спектакл, кој ќе се снима со најсовремена техника со оглед на тоа дека подоцна ќе биде изработен и телевизиски проект.