Француски „Декатлон“ најавува повеќе од 60 нови продавници во Германија

Францускиот синџир продавници за спортска опрема „Декатлон“ (Decathlon) најави повеќе од 60 нови продавници во Германија до крајот на 2027 година, посочувајќи дека има намера да ја искористи можноста создадена од слободните канцелариски простории во центрите на градовите.

„Декатлон“ моментално има 86 продавници во Германија, а за две години би требало да има повеќе од 150.

Отворањето на нови продавници и модернизацијата на постојните локации ќе бара до 100 милиони евра инвестиции и веројатно отворање илјадници нови работни места, изјави шефот на германските операции на „Декатлон“, Арно Саурет.

„Декатлон“ сака да го зголеми уделот на пазарот и приходите, нагласи Саурет, без да даде бројки.

До крајот на оваа година, француската компанија има намера да отвори две нови продавници во Германија, вклучувајќи помала локација на главната станица во Потсдам и поголема во центарот на Хамбург.

Тие, исто така, размислуваат за проширување на бизнисот во други градови, како Нирнберг, Фрајбург, Росток, Оберхаузен и во пошироката област на Касел.

Германските граѓани ги намалуваат трошоците поради економската несигурност и инфлацијата, но „Декатлон“ гледа можност во слободни деловни простории во центрите на градовите и има намера да ја искористи за да им се приближи на клиентите, вели шефот за проширување Стефан Кајзер.

Ќе се отворат нови продавници во трговските центри и во пешачките области, фокусирајќи се на специфични спортови, во зависност од побарувачката. Во Минхен треба да се отвори продавница за планинска спортска опрема.

Германскиот пазар за спортска опрема е многу конкурентен и се мери во милијарди евра. Водечката позиција ја зазема „Интерспорт“ со годишен приход од околу 3,5 милијарди евра, пред „Спорт 2000“ со 2,95 милијарди евра.

Приходите на „Декатлон“ се околу 1,1 милијарди евра.