Форум за штедење и инвестиции во земјите од Централна, Источна и Југоисточна Европа

Европската комисија денеска во Брисел е домаќин на „Форумот на Виенската иницијатива 2025“, чие овогодишно издание се фокусира на релевантноста на проектот на ЕУ – Унија за штедење и инвестиции, за економиите на Централна, Источна и Југоисточна Европа.  

Форумот, на кој е најавено учество на гувернери на централни банки, министри, високи функционери на Европската банка за обнова и развој, Европската инвестициска банка, Светската банка, Меѓународниот монетарен фонд и Европската централна банка, како и претставници на финансискиот сектор, ќе започне со воведно обраќање на еврокомесарката за финансиски услуги и Унијата за штедење и инвестиции, Марија Луис Албукерке. 

Унијата за штедење и инвестиции е иницијатива на Еврокомисијата чија цел е создавање подобри финансиски можности за граѓаните и бизнисите преку зајакнување на потенцијалите на финансискиот систем за насочување на заштедите кон продуктивни инвестиции.  

Од друга страна, Виенската иницијатива е рамка посветена на заштита на финансиската стабилност на Европа, функционирајќи како платформа за поврзување на приватниот и јавниот сектор, Европската комисија, релевантните институции на ЕУ и клучните меѓународни финансиски институции.