Фон дер Лајен се сретна со Радев во Варна. За Македонија не станало збор

Европската унија ќе ѝ обезбеди на Бугарија 10 милиони евра за операции за пребарување и спасување во Црното Море и уште 50 милиони евра за забрзана изградба на заеднички бугарско-романски центар за поморска безбедност.

Ова го објави претседателката на Европската комисија, Урсула фон дер Лајен, во Варна, каде што се сретна со премиерот Румен Радев.

Главната тема на разговорите, како што јавуваат бугарските медиуми, била ситуацијата во Црното Море и војната во Украина. Нема ниеден навод дека се разговарало и за Македонија и нејзиниот европски пат.

Лајен уште еднаш ја најави солидарноста на ЕК и европските институции со Бугарија и Романија по серијата напади врз трговски бродови во Црното Море. Покрај тоа, таа најави подготвеност на ЕУ да обезбеди дополнителна помош на Бугарија за справување со странски информативни кампањи. Таа уште еднаш повика на европска поддршка за Украина.

Претседателката на ЕК беше пречекана во Варна со протест на симпатизери на проруската партија Преродба. Таа беше исвиркана и повикана да „си оди“.

Фон дер Лајен истакна дека нападите врз трговски бродови ќе бараат заеднички европски одговор.

Според неа, слободната пловидба во Црното Море треба да се зачува, бидејќи е од клучно значење и за економијата на регионот и за меѓународната трговија и испораката на храна.

„Дојдов со јасна порака: Европа стои зад Бугарија во овие тешки времиња, бидејќи безбедноста на Црното Море е безбедноста на Европа. Беспилотните летала потопуваат трговски бродови, палат пловни објекти и убиваат цивили. Луѓе ги губат животите на море, бродовите се оштетени, а трошоците за осигурување растат вртоглаво. Намерата зад овие напади е стравот и несигурноста се шират во Европа. Го знаеме овој модел на дејствување и градиме отпорност против него. Затоа можете да сметате на силен и обединет европски одговор“, рече претседателката на ЕК.

Ден претходно, таа беше во Романија, а по Бугарија ќе ја посети Турција, каде што ќе учествува на меѓународна конференција на ОН посветена на глобалните климатски промени.

Премиерот Румен Радев, од своја страна, рече дека предлогот за мораториум на напади врз цивилни бродови во Црното Море, поднесен од Бугарија и Романија, има поддршка од раководството на Европската комисија и европските лидери.

Лајен, исто така, предупреди за континуираните кампањи за манипулација со странски информации насочени кон европските земји.

„Нашиот одговор е јасен. Ние се спротивставуваме на тоа. Затоа претходно оваа година го создадовме Европскиот центар за демократска одржливост. Ги обединува најдобрите експерти од целата Европска унија, а денес предлагаме тесна соработка со бугарските власти за следење, откривање и разјаснување на овие кампањи“, рече Фон дер Лајен.

Таа истакна дека тоа е многу важно засилување за Украина.

„Русија беше таа што ја нападна Украина. Ако Украина престане да се бори во тој момент, ќе биде избришана од картата. Ако Русија престане да се бори во тој момент, војната ќе заврши“, рече фон дер Лајен.

Владата на Румен Радев се спротивставува на војската и финансира помош за Украина, а тој е еден од ретките европски лидери кои ја бранат проруската позиција.

Бугарија е исто така меѓу земјите кои изразија резерви во врска со идниот заем за Украина во вредност од 45 милијарди евра.