Европол прифати воспоставување соработка со Косово

Управниот одбор на Европол на својата последна седница го одобри склучувањето Рамковен договор со агенциите за спроведување на законот во Косово, соопшти денеска хрватското Министерство за внатрешни работи, пренесе Слободна Европа.

Договорот предвидува соработка меѓу Европол и косовската полиција, царината, даночната администрација и единиците надлежни за спречување на перењето пари во борбата против организираниот криминал, корупцијата и другите форми на сериозен криминал.

Според соопштението на хрватското министерство, договорот отвора нови можности за меѓународна полициска соработка, како што е пристап до комуникацискиот канал „Европол“ и, како што се забележува, договорот обезбедува проактивен начин на соработка со сите земји членки на ЕУ.

Министерството за внатрешни работи потсетува дека Република Хрватска, во својство на претседавач со Советот на ЕУ, силно го охрабри зајакнувањето на соработката со партнерите од Југоисточна Европа, што е потврдено со Декларацијата од Загреб, донесена на 6 мај, на состанокот на лидерите на ЕУ и земјите од Западен Балкан во областа на миграцијата и безбедноста.