Еве на која берза беше најдобро да се инвестира минатата година

Минатата недела на светските берзи се тргуваше мирно, бидејќи немаше вести кои битно би се одразиле на пазарите, а цените на акциите благо пораснаа со што се консолидираа добивките во текот на целата година.

На Волстрит, Индексот Дау Џонс минатата недела зајакна за 0,8 отсто, на 37.689 поени, додека S&P 500 порасна за 0,3 отсто, на 4.769 поени, а индексот Насдак порасна за 0,1 отсто, на 15.011 поени.

Овие индекси пораснаа деветта недела по ред, а во текот на неделата Дау Џонс достигна рекордно ниво, додека S&P 500 се приближи до рекордното ниво за помалку од 1 процент.

Така, индексите ги консолидираа своите добивки во 2023 година. Дау Џонс порасна за 13,7 отсто, S&P 500 24,2, а Насдак индексот 43,4 отсто.

Силниот раст на цените на акциите во изминатата година е благодарение на постепеното ублажување на инфлацијата во САД и забавувањето на економскиот раст.

Имено, поради ова американската централна банка најверојатно го заврши циклусот на зголемувања на каматните стапки, па следуваат намалувања на каматите.

На пазарот на пари, се проценува дека ФЕД би можел да започне со намалување на каматните стапки веќе во март.

Пазарот е поддржан и од уверувањето на инвеститорите дека и покрај агресивното зголемување на каматните стапки во последните години, економијата ќе избегне рецесија.

Благодарение на ова, индексот S&P 500 растеше девет недели по ред, што не е забележано од 2004 година.

„Ова е еден од најголемите пазарни скокови на крајот на годината, а започна уште пред пораките на ФЕД во средината на декември во врска со каматните стапки и инфлацијата. Тоа покажува колку далеку сме стигнале од дното на „мечкиниот“ пазар минатата година и ги потсетува инвеститорите дека после темните облаци секогаш доаѓа сонце“, рече Рајан Детрик, стратег во Карсон Груп.

И на повеќето европски берзи цените на акциите пораснаа минатата недела. Истовремено, лондонскиот ФТСЕ индекс зајакна за 0,5 отсто, на 7.733 поени, а франкфуртски DAX  за 0,3 отсто, на 16.751 поен. Парискиот CAC, пак, ослабе за 0,3 отсто, на 7.543 поени.

Во целата измината година овие индекси бележат значителен раст. Индексот STOXX 600 на водечките европски акции скокна за 12,6 отсто, со што го надомести најголемиот дел од загубата од претходната година. Затоа, се движи околу највисокото ниво во последните 23 месеци.

Германскиот DAX порасна за речиси 20 отсто во текот на изминатата година и покрај независната ситуација во економијата.

Францускиот CAC, пак, порасна за повеќе од 16 отсто, а британскиот FTSE за околу 3,6 отсто.

Силниот раст на берзанските индекси во земјите од еврозоната е благодарение на проценките дека Европската централна банка, како и ФЕД, го заврши циклусот на зголемување на каматните стапки и следува нивно намалување.

И на повеќето азиски берзи оваа година цените на акциите пораснаа. MSCI индексот на азиско-пацифичките акции, без Јапонија, порасна за околу 5 отсто, што е негова прва добивка по две години пад.

Најмногу оваа година скокна јапонскиот индекс Никеи, околу 28 отсто и се движи на највисоките нивоа во последниве повеќе од 30 години.

Следуваше тајванската берза со раст од речиси 27 отсто, додека индискиот Нифти индекс порасна за околу 20 отсто.

Од друга страна, цените на акциите најмногу паднаа годинава на берзата во Тајланд, околу 15 отсто.

Индексот Ханг Сенг во Хонг Конг, од друга страна, се лизна за околу 14 отсто, додека индексите во Шангај се лизнаа за повеќе од 10 отсто. Ова е последица на кризата на кинескиот пазар на недвижности и побавното од очекуваното закрепнување на економијата од кризата со корона.