Два последователни дена има надминати вредности на загадување, Владата и Градот треба да препорачаат мерки

Министерството за животна средина и просторно планирање денеска звести дека воздухот во повеќе делови од Скопје и во Струмица бил загаден над дозволеното два дена по ред. На ред се Владата и Град Скопје кои треба да донесат мерки за заштита на граѓаните од штетното влијание на загадениот воздух. 

Согласно Уредба за изменување и дополнување на Уредбата за гранични вредности  за нивоа и видови на загадувачки супстанции во амбиентниот воздух и прагови на  алармирање, рокови за постигнување на граничните вредности, маргини на  толеранција за гранична вредност, целни вредности и долгорочни цели (Службен  весник на Република Македонија бр. 183 од 14.12.2017 година) во која е дефиниран  прагот на алармирање на суспендирани честички со големина до 10 микрометри  (надминување на вредноста од 150 μg/m3 во текот на два последователни денови) и  добиената временска прогноза од Управата за хидрометеоролошки работи, Ве  информираме дека истиот е надминат на мерните места во Скопје – Центар, Гази  Баба, Лисиче и Ректорат и Струмица.  

Во табелата се прикажани среднодневните концентрации на PM10 на мерните  места каде има појава на надминување на праг на алармирање. 

*концентрациите се изразени во μg/m3

Ваква состојба предвидува носење на следниве препораки до граѓаните:

• да се избегнува користењето на возила, колку што е можно, а ако се користат возила, повеќе лица да се организираат да се возат во едно возило;
• да се користи јавниот превоз;
• рано наутро и доцна навечер да се избегнува долготрајна изложеност на отворено;
• за затоплување на домовите да не се користат отпадни материјали, прегорено машинско масло, лакирани и обоени отпадоци од дрво, стиропор, ПЕТ амбалажа, гуми и каков било синтетички материјал;
• да се користи суво и чисто дрво без примеси од земја и од отпадоци;
• печките на дрво да се користат и одржуваат според упатствата на производителот;
• редовно да се чистат оџаците;
• да се одложат сите активности на отворено;
• да се почитува забраната за дотур на роба во централното градско подрачје во периодот согласно со издадените одобренија од Градот Скопје.