Два „канадери“ од Грција го гаснат пожарот кај Дојран

Грција испрати два противпожарни авиони од типот „канадер CL-415“ за гаснењето на големиот пожар во селото Николиќ во општина Дојран во близина на границата. Тоа е втора помош од Грција во изминатите четири дена, јави дописничката на МИА од Атина.

Од Министерството за цивилна заштита и климатски кризи на Грција соопштија дека во 16,53 часот по локално време двата „канадери“ полетале од Солун за да помогнат во справувањето со огнената стихија.

Испраќањето на воздухопловите е преку Европскиот механизам за цивилна заштита (UCPM), кој беше активиран по барање од Република Северна Македонија.

Во средата, по билатерално барање од Центарот за управување со кризи до Единствениот координативен центар за операции и управување со кризи на Грција, исто така за пожарот кај Дојран, грчката влада веднаш позитивно одговори на барањето за помош и испрати два канадери и две противпожарни возила со осум пожарникари.