Градоначалничката на Град Скопје, Данела Арсовска во гостување на телевизија синоќа најави дека приватните превозници ќе се вратат на скопските улици и ќе почнат да возат до крајот на месецов.
„Она кое го имавме како постапка, беше прекинато во два наврати. Имаа недостатоци во документацијата, сега им е целосна документацијата, и во рамки на законски, јавниот повик е исполнет, договорот се склучува неделава, и очекувам скоро дека ќе се реши. Од прилика осум дена од потпишувањето на договорот приватните автобуси ќе се вратат на улиците и очекувам тоа да биде кон крајот на овој месец. Мислам дека и пред почетокот на јуни ќе бидат исполнети условите“, рече Арсовска во емисијата „10 минути“.
Од друга страна, советникот во Град Скопје, Стефан Андоновски вчера соопшти дека Арсовска тајно ги платила долговите кон приватните превозници, но го држи градот во клинч бидејќи не сака да потпише нов договор. Тој рече дека ЈСП се обидува да покрие она што покривале и повеќе од стотина автобуси и оти градоначалничката рекла дека градот нема да биде блокиран, но, нагласи, граѓаните не можат да стигнат на своите работни места, со саати се чека на автобуските постојки, а автобусите се преполни.
На брифингот со новинари, каде отсуствуваа новинарите кои водат скопска рубрика, градоначалничката Арсовска пак најави дека приватните превозници ќе почнат да возат низ Скопје со 80-тина автобуси од другата недела.
Јавниот градски сообраќај во Скопје со проблеми е од ноември лани, кога почна штрајкот на приватните превозници заради неисплатен долг од ЈСП. Јавното сообраќајно претпријатие им должеше на приватните превозници околу 10 милиони евра. Парите сега ги исплатил Градот, а по повеќе јавни повици, на кои наводно превозниците доставиле непотполни документации, нивните автобуси сѐ уште стојат по неформални паркинзи низ Скопје. Граѓаните пак ги чекаат проретчените автобуси на ЈСП, кои мораше да ги преземат линиите претходно опслужувани од приватните превозници.
